ع الطاير
أكيد مش فريد شوقى اللى كان إمبارح يعنى 27 يوليو ذكرى وفاته الله يرحمه وطبعا الجيل الجديد يمكن مايعرفش الملك فريد شوقى وليه كان اسمه وحش الشاشة وملك الترسو والحاجات دى كلها، لأن أولادنا من جيل الموبايل أول ما يسمعوا كلمة وحش الشاشة أكيد فكرهم يروح للموبايل وشاشة الموبايل أو التابليت أو الآى باد لأن الشاشة بالنسبة لهم هى دى حتى التليفزيون دلوقتى مبقاش اسمه تليفزيون إنما بقى اسمه شاشة ومفيش حاجة اسمها تليفزيون هى شاشة عرض واتفرج على اللى إنت عاوزه مش قناة أولى وتانية ومفيش غير كدة ده كان زمان إنما دلوقتى إنت اللى تختار عاوز تشوف إيه على الشاشة.. المهم الله يرحم زمان وليالى زمان وأفلام زمان وملك ووحش الشاشة فريد شوقى وجيله من الفنانين العظماء.
وخلينا دلوقتى فى وحش الشاشة الجديد بصراحة هى ببجى واخواتها وال9ألعاب اللى واخدة وقت وتفكير وعيون وانتباه أولادنا وأحفادنا وكمان الجيل الأكبر شوية حتى طلبة الجامعات وكمان شاشة البلاى ستيشن والألعاب ويبقى هنا وحش الشاشة اللى بيكسب أصحابه فى اللعب.. إنما تبقى الشاشة دائما هى البطل وأكيد كلنا جيل قديم وجديد معظم وقته فى الشاشة أما على السوشيال ميديا أو للفرجة أو للعب أو للاتصال المهم أن الشاشة هى أهم شىء فى الحياة كلها ولا شيء أهم منها حتى وإحنا مع بعض كل واحد باصص فى الشاشة.. طيب ده كويس ولا إيه أكيد الدنيا كلها دلوقتى أونلاين وعالم رقمى ودنيا جديدة خالص وعشان كده لازم أولادنا يفهموا إن الشاشة مش للعب بس إنما ممكن كمان تعليم وتدريب وشغل من خلالها وده دور البيت والمدرسة والجامعة والوزارة من جانبها موفرة فرص التعليم والتدريب والاعداد والتأهيل لسوق العمل المحلى والعالمي وعشان تبقى وحش الشاشة لازم تبقى معلم زى فريد شوقى إنما مش على طريقته يعنى لازم تبقى متمكن جدا وفاهم تقدر تستخدم الشاشة اللى قدامك د ى فى شغل وتبقى متميز جدا فى الشغل ده عشان الشركات الإنترناشيونال تتسابق للتعاقد معاك وساعتها تقدر تحقق كل أحلامك وطموحاتك وتبقى بجد وحش الشاشة.