(فيديو) أول تعليق ناري من تامر حسني على تصريحات حلا شيحة ضده وتبرؤها من أحضانه في فيلم "مش أنا"
![حلا شيحة وتامر حسني](/themes/alwafd/assets/images/no.jpg)
أثارت الفنانة حلا شيحة ضجة واسعة بعدما شنت هجوماً عنيفاً على النجم تامر حسني بسبب استيائها من المشاهد التي تجمعها معه في كليب أغنية "بحبك" المأخوذة من فيلمهما الأخير "مش أنا"، حيث وجهات له رسالة شديدة اللهجة عبر حسابها الشخصي بموقع تبادل الصور والفيديوهات "انستجرام".
اقرأ أيضاً..
حلا شيحة تهاجم تامر حسني لهذا السبب وتعلق " ده ميرضيش ربنا " ( تفاصيل )
أول رد فعل لتامر حسني على تصريحات حلا شيحة
وفي سياق متصل، علق تامر حسني على رسالة حلا شيحة بتعليق ناري عبر حسابه الشخصي بموقع التواصل الاجتماعي الأشهر "فيسبوك" قائلاً: "نهاركم جميل يا أغلى الناس الحقيقه عمري ما بتخيل إني أدخل في نقاش بالشكل دا مع زميل بحترمه و كان في بينا كل خير".
وتابع: "للتوضيح بما إنك يا حلا كتبتي بوست و أشركتي الجمهور الكريم معانا بدال ما كنتي تكلميني شخصياً و نتناقش بيني و بينك ، فا أنا مضطر أرد هنا برضو ... أولاً أنا عمري ما وعدتك إن الكليب مش هينزل دا محصلش اصلاً يا حلا مش أنا خالص اللي أوعد و أخلف….. الحقيقه اني إحترمت كلامي معاكي و وعدتك أشيل مشاهد تانيه طلبتيها و شيلتها بالفعل و شكرتيني عليها".
وأردف: "و لو حابه تفتكري المشاهد اللي اتشالت بعد اذنك روحي شوفيها في المونتاچ عند الأستاذ عمرو عاكف او كلميه يبعتهالك كلها موجوده ، و بعدين الفيلم بقاله ٣ اسابيع في السينمات و الكليب موجود جوه الفيلم هو بالنسبالك الحرام إننا ننزل الكليب على اليوتيوب بس !! إنما الكليب يتشاف جوه السينمات عادي ؟؟؟؟ منطق غريب فعلاً يا حلا".
وأضاف: "و بعدين هو مش أنتي اللي مضيتي عقد و تقاضيتي عليه مبلغ كبير عشان الدور دا بعينه !!!!! هو مش إنتي اللي صورتيه و مثلتيه بنفسك و بمنتهى الرضا ولاّ حد أجبرك ؟!!!!!! و للتوضيح للجمهور الكريم أنا و المخرجه الأستاذه ساره وفيق بعتنالك و كنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظه تقوليها ، ماكنتيش بتردي علينا و تليفوناتك كلها كانت بتقفل في وشن".
واستكمل "تامر" قائلاً: "إنتي للأسف يا حلا متعاملتيش صح مع الموقف كان لازم تهتمي بأمرك أكتر من كدا و لو كان ليكي أي طلب تاني كنت هعمله بكل حب إنما إنتي فجأه أختفيتي و مكملتيش تركيب صوتك في الفيلم ولا جيتي تتصوري عشان آفيش الفيلم أصلًا و مخليتيناش نعرف نعمل آفيش مجمع !!! و بقيتي تقفلي تليفوناتك و تكنسلي علينا كلنا و بعدين أي فيلم بيبقى ليه خطه مسبقه في الدعايه و انتي عارفاها كويس و وافقتي عليها".
واختتم "تامر"رسالته لحلا شيحة قائلاً: "دا كليب رومانسي يعني معقول كنتي عايزه المنتج يشيل كل مشاهدك اللي صورتيها من الكليب و يطلعني بغني و بقول الكلام الرومانسي دا للأستاذ ماجد الكدواني مثلاً هو دا يُعقل ؟؟!!!!! أنا زعلان منك جداً يا حلا على مفردات البوست بتاعك الغير موفقه و مستحيل هرد بطريقتك اللي فيها تجريح و اتهامات باطله ليا إحتراماً لحجات كتير يمكن فايتاكي بس مش هتفوتني و على فكره انا واثق انك عارفه اني مستاهلش منك كدا و هكتفي بالتوضيح دا و ربنا يهدي الجميع و يكتبلك كل الخير اللهم آمين"
حلا شيحة تواصل إثارة الجدل حول مشاركتها في فيلم "مش أنا"
لم تكن هذه المرة الأولى التي تثير فيها حلا شيحة الجدل حول مشاركتها في فيلم "مش أنا" مع النجم تامر حسني، إذ أنها تجاهلت الفيلم حينما تم طرحه بدور العرض السينمائي، ومع انتقاد الجمهور إليها بررت أفعالها بقولها: "بالنسبة لفيلم (مش أنا) الحقيقة أنه تم تصويره من أكتر من سنة ونص وبسبب ظروف كورونا أتأخر جدا نزوله وأنا كمان حالي اتغير واتجوزت الحمد لله والفيلم فعلا بقى (مش أنا) وباتمنى التوفيق لكل زملائي".
وتعرضت "حلا" لانتقادات كثيرة من متابعهيا، فيما زعم البعض أنها ترغب في اعتزال الفن والتمثيل نهائياً، خاصة ً بعد تغيبها عن حضور العرض الخاص لفيلم "مش أنا" ومن ثم تعليقها
حلا شيحة تهاجم تامر حسني وتتبرأ من أحضانه في فيلم "مش أنا"
يُشار إلى أن حلا شيحة هاجمت تامر حسني قائلة: "انا اتفاجئت جدا ًبنزول كليب يجمع فيه مشاهد متفرقة من الفيلم و في ايام ذي الحجة ايام مباركة و خصوصاً بعد اخر بوست نزلته و وضحت فيه انا ايه .. اتفاجئت اكتر خصوصا ًبعد وعد تامر حسني ليا وتأكيده انه حيحترم رغبتي و بعض الطلبات اللي طلبتها منه بكل احترام وود الصيف اللي فات و اكدلي انه حيحترم رغبتي".
وتابعت: "احنا يمكن نجحنا بمقايس الدنيا بس صدقوني بمقايس ربنا احنا لم و لن ننجح انا عارفة و متاكدة ان زملائي جواهم خير بس للأسف فتنة الشهرة و النجاح مش بتخلينا نشوف ونقيس الامور صح".
وأردفت: "بتكلم من قلبي الكليب ده ميرضيش ربنا و انا عيطت لاني شفت نفسي في المشاهد دي .. دي كانت زلة نتيجة ظروف مريت بيها و كلنا بنغلط و لازم نغلط علشان احنا بشر بس المصيبة اننا بنغفل و بننسى .. انا مش حتكسف من حد انا تبت من المشاهد دي و هي لا تصح و انا غلطت و بصلح و اهم حاجة ان ربنا يرضى عني لان في الاخر ده اللي حينفعنا مش الشهرة و لا النجاح لا هو مش نجاح أصلا علشان النجاح الحقيقي حاجة تانية خالص احنا اغلبنا ناسينها الا القليلين منا "
وأضافت قائلة: " الفن لو بيخلينا نبعد عن منهج ربنا و منبقاش قدوة لولادنا يبقي باطل و ميبقاش فناحنا كلنا عندنا امتحان في الدنيا دي و حابة افكرك بالفيديو ده يا تامر اللي قولت فيه انا مش بتمنى أموت وأنا مطرب انا دايما خايف من كده.. كلام أكيد قولته في لحظة صدق جواك و جوانا كلنا".
وختتمت "حلال" رسالتها لتامر حسني قائلة: "شوفه تاني يمكن يفكرك ان جواك اكيد في صراع و انا و كلنا كلنا بنغلط بس المهم في الاخر نتدارك الغلط و نصلح .{إِلَّا مَن تَابَ وَءَامَنَ وَعَمِلَ عَمَلࣰا صَـٰلِحࣰا فَأُو۟لَـٰۤىِٕكَ یُبَدِّلُ ٱللَّهُ سَیِّـَٔاتِهِمۡ حَسَنَـٰتࣲۗ وَكَانَ ٱللَّهُ غَفُورࣰا رَّحِیمࣰا}.. الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد."
فيلم "مش أنا"
جدير بالذكر أن فيلم "مش أنا" بطولة تامر حسني، حلا شيحة، ماجد الكدواني، سوسن بدر ونخبة كبيرو من نجوم الوسط الفني، قصة تامر حسني وإخراج سارة وفيق.