حكومة ملهاش فينا!

بعد ترقب وطول انتظار.. وبناءً على رغبة شطار برلمان «كفر حلاوة» الكُرام.. عُقدت هذا الأسبوع جلسة استفتاحية تخللتها فناجين القهوة السادة فى كوفى شوب «السعادة»!
> ولأن الجلسة شعبية لمناقشة أحوال الرعية فى ظل العيشة التقشفية فإن «زرزور» زعيم الأبعدية.. فاجئنا بالحضور وأخبرنا بأن كل شيء فى «كفر حلاوة» عــن الأسعار على ما تُرااااام.. خصوصاً علاج الغلابة على «روشتة الأحلام» تمام التماااام.. حتى أزمات ارتفاع أسعار البنزين والسولار والبوتاجاز انطفأت من زمااان.. وأسعار شرائح الكهرباء خرجت عن السيـطرة من زمن كان.. وكل الأمور فى «كفر حلاوة» تمام بدون الرد والمناقشة بأى كلام!
> فجأة.. تكهرب جو جلسة برلمان «كفر حلاوة».. وطلب النايب المخضرم «فلطح المسلطح» التعقيب حتى تكون حكومته اللى جاية فى «كفر حلاوة» صوت وصورة فى التمام.. ويضمن إدراج اسمه فى «التشكيك» الوزارى اللى جاى وتكون كل أموره تمام التمام!
> ووسط احتجاجات جبهة «المستقتلين» بدأ الوزير«فالح» يتنحنح قائلاً : أطلب منكم يا إخوانا التريث والهدوء حتى تتضح أمامنا كل الأمور بعيداً عن دائرة المشاكل والهموم.. وعلى العموم حكومة بلدنا «كفر حلاوة» اللى عايزة تعمله.. هتعمله!
> ويبدو أن النايب «زعلان» لم يعجبه تصفيق شطار برلمان» كفر حلاوة» ووقف والغيظ يمتلكه محتجاً: «ازاى يا أخوانا تصقفوا على الفاضى والملياااان.. والناس أهلنا فى «كفر حلاوة» بيناموا ويصحوا يلاقوا الغلاء نار نار والأسعار مش فى التماااام!
> وطلبت النايبة «هبهبة أم نص لسان» الميكرفون علشان تقول رأيها بصراحة.. وبعد أن شربت فنجان القهوة المحوجة بالمستكة والحبان.. بدأت تقرأ الفنجان من غيرهمس ولا كلام وتُخبر كل الحاضرين بقرب الإطاحة بنُص شطار حكومة «كفر حلاوة» الكُرام!
> وبدون مقدمات.. ثار النايب الهُمام.. رئيس دايرة الأعمال محتجاً: أزاى تتهمنا النايبة «هبهبة» بأن حكومتنا- يطوّل عمرها- حكومة «تنضيف الجيوب وتجويع البطون».. إحنا لا مؤاخذة معانا فلوس زى الرُز.. واللى مش عاجبه هنقوله بكل أريحية: «بُص للعصفورة وهُس»!
> فجــأة ينتاب النايب «حلق حوش» حالة معفرتة وانتزع الميكرفون ثائراً: إزاى يا إخونا يقول النايب الهُمام أن الفلوس عنده زى الرز.. والحكاية عندنا محتاجة «عد وفرز»!
> وعندئذً أدرك «كشكش افندي» أن الأمور بدأت تدخل فى سكة الممنوع.. فأسرع بإعلان السؤال التوقيفى: الموافق من السادة شطار «كفر حلاوة» على قفل باب المناقشة, يتفضل برفع صوابع إيده الشمال.. الأغلبية تمام ومفيش بعدهم أى كلام!
شَوْكَشَة الأسبوع
>> فى بلدنا «كفر حلاوة».. فينا اللى مكفينا.. واللى مكفينا حكومة ملهاش فينا..غير دعم التموين والعيش اللى مش مكفينا.. وعجبى عليك يا زمان!!
>> بصرُخ من زمان : أنا مصرى وأخويا مصرى.. والأسعار «قطمت» وسطى!
>> فى أسوق الغلاء.. الأسعار نازلة «طخ».. والغلابة نازلين «لطم».. يا حسرة عليهم.. يا حسرة عليهم!