حسام حسن يدافع عن محمد الشناوي ومحمد هاني بعد بطولة أمم أفريقيا

 دافع حسام حسن، المدير الفني لمنتخب مصر، عن محمد الشناوي، حارس الفراعنة، بعد وتعرضه لانتقادات كثيرة، بسبب تراجع مستواه بشكل كبير وعدم تقديم المستوى المأمول في بطولة كأس أمم أفريقيا.

 وقال العميد في تصريحاته خلال المؤتمر الصحفي: "محمد الشناوي كان عنده ظروف وضغوط، صعود وهبوط في المستوى ولكن يبقى حارسًا كبيرًا ومميزًا وله تاريخ كبير".

 وأضاف: "محمد هاني ورامي ربيعة حالتهما جيدة، ومحمد حمدي من اللاعيبة المهمة وكذلك حمدي فتحي بيلعب بطولة محترمة، لكن مش بنفس قوة البطولات الأفريقية والأوروبية".

حسام حسن: "قدمنا أداءً جيدًا في أمم أفريقيا رغم تشاؤم الجمهور"

حسام حسن يكشف تطورات ملف اللاعبين "مزدوجي الجنسبة" في منتخب مصر

 وتابع: " إمام عاشور طبيًا كان مفروضًا يلعب من السنة الجاية وكان محتاج تجهيزات وفيتامينات، الفيروس اللي كان عنده صعب جدًا ومحتاج أدوية ومضادات حيوية تهد جبل، لكن قدرنا نوصله لحالة كويسة وقولت إن وجوده مهم جدًا وكان من أحسن اللاعيبة اللي شاركت".

 وواصل: "صلاح ومرموش ومصطفى محمد وتريزيجية وحالتهم كانت غير جيدة قبل البطولة، وظروف مشاركتهم صعبة لكن قدموا مستوى كبيرًا".

 واستطرد: "إحنا دخلنا أمم أفريقيا بكل الشيلة دي ووصلنا نصف نهائي.. هل ده كان بالصدفة، لا، لكن بلاعيبة عندها جلد إنها عاوزة تعمل حاجة، وجهاز فني قدر ياخد منهم أقصى حاجة وبيوظفهم بشكل معين وطريقة معينة وكل مباراة ليها ظروفها والتكتيك المناسب ليها، الموضوع مكانش سهل".

 وأكمل: "تخيل مع كل المشاكل دي وبتدخل لاعيبة جديدة كمان، فلازم نوضح طالما بنعمل كشف حساب للي فات، البطولة دي في الوقت ده كرم من ربنا إننا نستعد لكأس العالم، البطولة المحلية محتاجة تطوير كتير وندي فرص للمواليد ٢٠٠٦".

واختتم: "محتاجين نزود عدد المحترفين، الأندية الكبيرة عندها مهاجمون أجانب وباك ليفت أجنبي، فمينفعش تيجي تطلب من مدرب المنتخب يكون ساحرًا ويخلق لاعيبة، عاوز يبقى عندك منتخب قوي لازم تدي فرص للمدربين واللاعبين المصريين.. لازم تدي فرص للاعيبة تحترف وتاخد خبرات من الإمكانات العالية اللي بره".