برلمان له أنياب!

جلس الموظف الكُحيتى «فنجرى أبو جزرة» على قهوة «معاشات وسط البلد» يتبادل مع الجرسون «فهلوى الغلباوى» الحوار مُتخطيًا حاجز الرشق بالكلمات، حول لعنة الدولار.
< هاتلى يا غلباوى كوباية شاى بالنعناع
- خليها النهاردة يا فنجرى بيه بالياسمين
< أنت يا غلباوى هتشربنى على مزااااجك
- وعندك واحد شاى على ميه خضرا لـ « فنجرى بيه» وصلحه
< بلااااش ميه خضرا.. علشان بتشائم من وش الدولار الأخضر!
- نهارنا نادى وطريقنا أخضر زراعي
< روح يا «غلباوى» جيبلى كوباية الشاى وبلاش لكلكة فى الكلام
- هوه الكلام النهاردة مفروض عليه «ضريبة عقارية «!
< لأاااه.. ده مفروض عليه الدولار الأخضر المتمرد!
- كده زى الرجل الأخضر–لا مؤاخذه–بتاع السيما؟!
< أنت مش عااااايش فى البلد دى؟!
- عااااايش ومش عااااايش!!
< عايش ومش عارف تمرد الدولار عامل فينا إيه؟!
- عامل فينا إيه يا فنجرى بيه؟!
< الأسعار ولعت ناااار.. ناااار.. والحكومة باعتنا بأرخص الأسعار!
- يعنى أفهم من كلامك أن نار الشيشة هيه اللى ولعت فى الدولار!
< مكنتش دى كوباية شاى بالنعناع الأخضر!
- وعندددك واحد دولار أخضر.. واصرررفه!
< دولار إيه؟.. وزفت إيه؟.. أنا قُلتك شاى أخضر تفاحى بالنعناع!
- معلهش يا فنجرى بيه.. أصل أنا مِتغاظ قوى من الدولار وحزين جدًاًاًا على الجنيه!
< بقولك.. روح جيبلى كوباية الأخضر الهارى!
< حاااااضر.. جاااااااى!!
< حزين على زمن اللى شوفنا فيه الجنيه مهزوم 50 / صفر من الدولار!
- أحلى كوباية شاى بالنعناع الأخضر لـ «فنجرى بيه»!
< المشروب ده طعمه غريب قوى!
- ما غريب إلاّ الدولار!
< دولار تاااااانى.. مش كفايه الدولار ولع فى أسعار السنة الجديدة، وجوع بطون الناس الغلابة!
- أشرب يا فنجرى بيه النهاردة ببلاش.. أصلنا عملنا مشروب جديد أسمه «فخفخينا بالدولار» علشان الزباين اللى زيك تشرب وتتعكنن على سعر صرف الدولار!
< وعندئذً تدخل صاحب المقهى المعلم «أشفور شطورة» آمرًا الجرسون «فهلوى الغلباوى» بأن يعلق براويز الدولار الأسطورة على مدخل القهوة.. ويسمعنا أغنية «الدولار الدولار الدولار.. أخضر زى عسل الموز وأغلى من تمن اللوز».. ويقدم لينا تعظيم سلام وتحية على الجنية «أبو تعريفة»!
شَوْكَشَة الأسبوع
<< صرخة الإعلامى عمرو أديب بإذاعة جلسات مجلس النواب الجديد تندرج تحت شعار «الشعب يريد برلمان له أنياب».. وطبعًا الإعلام الحكومى هيذيع أغنية «ولا كان على بالى»!!