كل لما أشوف آسر ياسين فى عمل درامى رمضانى بحس انى قدام ممثل بيشبه الطاووس فى صفاته بيفضل مستنيك تلف لفتك وتتفرج على كل خلق الله لكن يوم لما تقرر تشوفه وتركز معاه هتتخطف فعليا و هيفردلك ريشه وهيفرجك جمال ألوانه ويبهرك برشاقة خطوته ويلف بيك فى رحلة من متعة الموهبة والاداء اللى ملهاش سقف ملهاش حدود وتبص تلاقى نفسك بتسكت كل أصوات الضجيج اللى حواليك علشان تركز معاه لحد لما ياخدك هووووب ف عمق العمل وكأنك جزء لا بتجزأ من ابطال العمل ده ويخلص آسر عرضه ليك ويقعد يتفرج عليك بقى باقى السنه وانت بتتنطط و بتتحايل عليه يكمل عرضه
آسر فنان بيصنع من اى دور بيقدمه قيمة فريدة من نوع خاص وربما يكون بيختار كمان باقى الفريق اللى هيكمل معاه اللوحة الجميلة وكلهم بلا استئناء مفيش عليهم غبار او غلطة كلهم ابدعوا ووصلوا بيك لاعلى درجات الاثارة فالعمل
وده اللى حصل فى النسخة المصرية من المسلسل الأمريكي سوتس رغم انها نسخة من مسلسل الا انك تحس انك بتشوفه لاول مره بطعم وصورة وشكل واداء مختلف
سوتس بالعربى بيقدم ليك نماذج من المحاميين اللى يتمنى اى محامى انه يكون زيهم نماذج بتمتلك القدرة والذكاء والاخلاص والضمير والاجتهاد فالمهنة واللى هى من اعظم مهن التاريخ على الإطلاق
من الاخر مسلسل يفتح نفسك تدخل كلية حقوق علشان تتخرج محامى وتجرى على زين ثابت تشتغل ف شركته
سوتس بالعربى مسلسل يستحق التقدير