ع الطاير
عاوز تبقى غني؟! بالذمة ده سؤال.. فى حد مش عاوز يبقى غنى؟! أكيد طبعا عاوز أبقى غنى ومشهور كمان وياريت من غير تعب، تصدق بقى إن فى أمل تحقق كل ده ومش بس كدة ده أمل فسيح يعنى ما لوش حدود.
يا عم خش فى الموضوع وقول لنا إزاى الكلام ده.. أقولك انسى الوظيفة الميرى ومربوط ع الدرجة وانسى كل ما له علاقة بالوظائف قطاع خاص أو عام، طيب يعنى جبت إيه من عندك، لا استنى انسى كمان طبعا أى مشروع تقليدى وتخلص من أى أفكار قديمة وانسى كمان التعليم العالى وكليات القمة والحاجات بتاعة مكتب التنسيق وركز بقى معايا.
أولا لازم تفهم إن الدنيا تغيرت خالص وتكنولوجيا المعلومات والاتصالات والحلول الرقمية هى الأمل الفسيح فعلا ويمكن مراهق أو شاب صغير يتحول إلى ملياردير بفكرة أو تطبيق وده حصل فعلا فى بلاد كتير وشوف بنفسك.
إذن هى صناعة واعدة جدا وثروات حقيقية تفوق البترول والغاز ويمكن الذهب، والعالم كله بيجرى بسرعة البرق نحو التحول الرقمى وتحول التعليم تماما نحو تكنولوجيا المعلومات والاتصالات والحلول الرقمية والتطبيقات الالكترونية.
وطبعا حضرتك عارف إن هناك دول عملاقة سبقت كل الدول الأخرى وأصبح هناك عدد قليل من الدول عملاقة فى هذا التخصص الصين واليابان والهند وطبعا أمريكا وقبلها يمكن كوريا، ودلوقتى ممكن شاب فى أى مكان فى العالم تطق فى دماغه فكرة مطرقعة تحقق له مليارات ولبلده كمان.
وغنى عن البيان أن فيسبوك مثلا كان مجرد فكرة شوف دلوقتى بتحقق كم مليار دولار وقيمتها السوقية كم وغيره كثير طبعا حتى فكرة أوبر وكريم ومواقع التجارة الإلكترونية والألعاب ببجى وأخواتها واحسبها انت بقى.
طيب فين مصر من كل ده؟ أقولك الحقيقة بقى إن فى اهتمام كبير وفرص تعلم وعمل متميز فى هذا التخصص والدكتور عمرو طلعت وزير الاتصالات وتكنولوجيا المعلومات يبذل جهده لتحقيق تنمية فى قطاع الاتصالات وتكنولوجيا المعلومات على كل المستويات وإتاحة فرص تعلم وعمل وتدريب وكليات وجامعات متخصصة.
بس الحقيقة بقى إن الحكاية أبعد من كده بكتير ولازم وعى الشباب وأولياء الأمور ببساطة لازم يفهموا إن الدنيا بتغيير ومبقاش فى فرص للتعليم القديم والمذاكرة والحاجات الروتينية دى.