رؤى
يقال والله أعلم إن مجموعة من العلماء اليابانيين ابتكروا طريقة جديدة سوف ترفع سرعة الإنترنت خمسة أضعاف سرعته الحالية، ووصفت السرعة الجديدة بالمذهلة، سوف تبلغ بإذن الله حوالى 178 تيرا بايت فى الثانية، نعم فى الثانية، صحيح أن لا أعرف ما هى التيرا، لكن ما فهمته أن سرعة الانترنت سوف تطير طيرا فى الفضاء.
وقيل إننا بعون الله، إذا أحيانا ربنا وكان لنا عمر، سوف نتمكن من تحميل 1500 فيلم، عربى أجنبى، ثقافى، وثائقى، تسجيلى، روائى، طويل قصير، فى ثانية واحدة، يعنى السرعة 178 تيرا فى الثانية، وتحميل 1500 فيلم فى الثانية، وقيل أيضا، والعهدة على الراوى، أن حجم الأفلام سوف يصل 15 جيجا بايت، والدقة 4 كى.
بالطبع بعضكم يعرف معنى كلمة « كى »، وكلمة « جيجا » ولن تطالبوا العبد لله بشرح أو تفسير، لأننى مثل الكثير أتعامل مع هذه المصطلحات باستعلاء، فقد سبق وشرح لى بعض المتخصصين معانيها، لكن جدكم إيده والأرض، فلا يعنينى كثيرا التيرا ولا الجيجا ولا البايت، وبالطبع لن أفهم معنى كلمة « كى » ولا بى.
لا أخفى عليكم سألت بعض العالمين بالكى عن حجم السرعة الجديدة، والفرق بينها وبين سرعة فتح صفحة جريدة على الإنترنت، فطس على نفسه من الضحك، وقال:
ــ فاكر العفريت اللى طلع لسيدنا سليمان زمان.
ــ قلت له: بصراحة كنت صغير ومش فاكر ملامحه كويس.
ــ قال: هنهرج
ــ قلت له: ايه اللى دخل عفريت سليمان فى الكى والتيرا والجيجا؟
ــ قال: السرعة، العفريت جاب لسليمان عرش بلقيس قبل ما يبربش.
ــ قلت له: يا ريته ما جابها، ما هى الموكوسة حاولت تغريه والعياذ بالله، وسليمان عمل زى يوسف الصديق..
ــ قال: احنا مش فى الموكوسة، احنا فى السرعة اللى جاب بها العرش، فاكر عفريت اسماعيل ياسين فى فيلم الفانوس السحرى؟
ــ اه، اللى كان بيقوله: يا مصطفى.
ــ كان بيجيب له الحاجة اللى بيطلبها فى ثانية.
ــ تقصد يعنى قبل ما قول يا فيلم، هلاقيه نزل؟
ــ مش قوى كده، بس قول يارب.
ــ مش هيقطع واحنا بنعرضه.
ــ بيقولك: الدقة 4 كى، تقول لى هيقطع.
ــ طيب هيبقى باقات برضه؟
ــ اسأل د. عمرو طلعت وزير الاتصالات.