"كلنا خالد سعيد" تقارن بين شباب مصر وبريطانيا في أعمال الشغب

الصفحه الاخيره

الخميس, 11 أغسطس 2011 14:02
كتبت - سارة عزو :

عقدت صفحة "كلنا خالد سعيد" على موقع التواصل الاجتماعي"الفيس بوك" أمس الأربعاء مقارنة بين الشباب المصري واللجان الشعبية التي تكونت لحماية الممتلكات أثناء ثورة 25 يناير وبين البريطانيين خلال موجة الشغب والعنف المستمرة منذ يوم السبت الماضي.

وأكد المسئول عن الصفحة على وجود فرق شاسع بين الطرفين قائلاً :"لما نقارن اللي حصل من أحداث في إنجلترا خلال اليومين اللي فاتوا وكمية المباني اللي اتحرقت والمحلات اللي سرقت رغم وجود الشرطة بشكل كامل بما حدث في مصر وقت الثورة برغم غيابها الشرطة بكامل قوتها، تفخر بالتزامنا وأخلاقنا وتقاليدنا واللي خلت الشعب ينزل يحرس المناطق اللي ساكن فيها ويدافع عن ممتلكاته وممتلكات جيرانه، أرفع رأسك فوق أنت مصري".

ومن ناحية أخرى علق أعضاء الصفحة على ما نشر، ومنهم محمد رأفت قائلاً:" إحنا مختلفين عنهم برغم التكنولوجيا والتقدم اللي هما فيه لان كلمة 7000 سنة حضارة اللي كنا بنتريق عليها في عهد مبارك ظهرت واضحة ومتجسدة في أعظم ثورة في التاريخ البشري، ومش فاضل غير إننا نوجه الحضارة اللي جوانا عشان نصنع حضارة جديدة للبلد ونسبق عن طريقها الدول دي، ونبقي في المكانة اللي نستحقها رغم

ما نحن فيه من فقر وجهل وتخلف فالحضارة لا تزال في داخلنا ولكنها كانت مدفونة وخرجت في الثورة"، وأضافت إنجي سعيد:"فعلا أنا فخورة ورافعة رأسي فوق لأني مصرية"، بينما قال أحمد يحيي :"والله إحنا أحسن من اللي بيقولوا على نفسهم متحضريين"، وأضافت لمياء كريم :" ادخلوها امنين، اللي حصل في انجلترا و مصر يوضح لنا الإرهاب فين و أي الشعوب أكثر حضارة وتقدم وأخلاق".

بينما تعارض مع هذه الآراء زائرين آخرين للصفحة ومنهم ياسر الحبشي قائلاً:" مش موافق علي فكره المقارنة بين الحكايتين شعب مصر محتاج يتعلم ويتعالج ويعيش عيشه آدميه، اللي حصل في مصر كان نتيجة ظلم شديد، ولسه قدامنا كتير عشان نبقى زي أوروبا، روحوا شوفوا عزبة بلال وقلعه الكبش و ١٥مليون عشوائي روحوا شوفوا قرى الصعيد و الـ٣٠ مليون فشل كلوي"، وقالت سارة زاهر:" بتقارنوا أوحش مافيهم و بأحلي ما في المصريين شكلها ما فيش في التغيير، وكمان إزاي تقارنوا أعمال بلطجة بثورة عظيمة زي

ثورة 25 يناير".

وأضاف عبد المنعم أبو بكر قائلاً:"انتم عايشين في الوهم، انجلترا طبعا أحسن، اللي يقرا كلامك ده يحس إن البلد كانت أمان و قال يعني المصريين عندهم أدب و أخلاق، الحاجة السلبية فعلا للثورة إنها خلت العالم الزبالة و الحثالة يظهروا و كل واحد فيهم عاملي فيها ضابط شرطة وتلاقيه أصلا مسجل خطر"، كما أكد مصطفى نصر قائلا :" بلاش نضحك على بعض، مصر مش أحسن من انجلترا، محلات كثيرة في خان الخليلي أتسرقت أثناء الثورة وبعدها، وبعدين لو باب الهجرة اتفتح لانجلترا .كل الناس هتهاجر وتطفش من البلد".

وكعادة المصريين فى اضفاء الفكاهة وروح الدعابة على كل شئ، حيث أكد إسلام البامبي على أن أحداث الشغب البريطانية قد تتعرض لمثل ما تعرضت له الثورة المصرية قائلاَ:"فيه إشاعة أن حمادة هلال هيعمل أغنية جديدة اسمها شهداء شغب انجلترا ماتوا في شغب انجلترا، حتى شيخ الأزهر والمفتي أصدروا فتوى إن مظاهرات لندن حرام شرعا، وبالنسبة لعمرو مصطفي قرر ينظم مظاهره عند ميدان القصر الملكي في لندن تحت شعار آسفين يا ملكة".

يذكر أن أعمال الشغب والحرق والنهب في شمال لندن كانت قد اندلعت يوم السبت الماضي،  وامتدت لتشمل مدن وأحياء أخرى وسط البلاد،  فيما تسعى الحكومة إلى تعزيز قوة الشرطة،  وفرض الإجراءات الكفيلة باحتواء الموقف بعد أن تعرضت محال تجارية وماكينات الصرف الآلي للبنوك للسرقة والنهب والتخريب، و حرق متعمد للممتلكات العامة.

شاهد شغب لندن

http://www.youtube.com/watch?v=4SLAka08hcA

شاهد الشباب المصري فى اللجان الشعبية

http://www.youtube.com/watch?v=2Zl1jQnleK0&feature=related

أهم الاخبار