ع الطاير
سيبك من هموم الثانوية العامة والتوتر والقلق وحكايات لها العجب عن صعوبة الامتحانات وعن الحليب والجمع والمفرد والكلام القديم ده.. وركز معايا فى اللى العالم كله شايفه.. الحكاية يا عبقرى مش مجموع ثانوية عامة وكليات القمة ومكتب التنسيق والنص درجة.. الحكاية أبسط وأهم كمان طبعا من كدة بكتير.. الحكاية إنك لازم تبص حواليك وتشوف الدنيا رايحة فين ووظائف المستقبل إيه شكلها والشغل اللى يكسب فلوس بجد ويعمل قيمة ومركز ومش مهم تكون وظيفة ميري.
مناسبة الكلام ده حاجتين أولها امتحانات الثانوية العامة واللغط الكتير حواليها وعلى فكرة بيتكرر كل سنة.. والحاجة الثانية إن الدكتور عمرو طلعت وزير الاتصالات وتكنولوجيا المعلومات شهد توقيع مذكرتى تفاهم مع شركة مايكروسوفت العالمية لتطوير المهارات الرقمية لأكثر من 220 ألف شاب سنويا لمدة ثلاث سنوات وتدريب 10 آلاف شاب فى أكثر عشر وظائف مطلوبة عالميا.
وده يخلينا نسأل سؤال مهم إيه هى الوظايف دى وهل هى مطلوبة محليا واقليميا أيضا يعنى ممكن أشتغل هنا فى مصر أو فى الخليج مثلا؟ الإجابة على الجزء الثانى طبعا مطلوبة جدا محليا وإقليميا أما إجابة الجزء الأول إيه الوظائف دى أكيد كلها مرتبطة بتكنولوجيا المعلومات والاتصالات أول الوظايف دى البرمجة يا سيدى لأنه مع التحول الرقمى فى العالم ستكون هذه أهم وظيفة وبعدها الأمن السيبرانى وحماية البيانات ودى بقى مهمة جدًا وأجورها ضخمة جدًا لأن مع التحول الرقمى الكامل والبيانات والتعامل ديجيتال هناك مخاطر الهاكرز والقرصنة دى وهنا تكمن أهمية قصوى للأمن السيبرانى ولازم تسبق القراصنة والهاكرز طول الوقت لتأمين البيانات والوظيفة اللى بعد كدة تحليل البيانات عشان خاطر تقدم مشورة للشركات والمؤسسات كمان عندنا وظايف تتعلق بالطباعة ثلاثية الأبعاد وما أدراك ما هى، دى قفزة عملاقة فى تاريخ البشرية كمان فى وظائف تتعلق بالماركتينج التسويق الرقمى يعنى، وطبعا ممكن تقولى طيب فين الطب والصحة والهندسة المعمارية والميكانيكا وفين الاستشارات القانونية والنفسية أقول لك موجود طبعا ومهمة جدا بس ها ترتبط ارتباطا وثيقا بتكنولوجيا المعلومات.
طيب خلاصة الكلام ده إيه؟ أقولك بكرة غير النهاردة وأكيد غير إمبارح وحكايات البكاء والتحسر على سؤال أو جزء من سؤال معرفتش تجاوب عليه فى الامتحان ده كلام عفا عليه الزمان خلاص ركز وشوف الدنيا رايحة فين ومحتاجة إيه.. وكل عام وأنتم بخير.