عجب العجاب من مصلحة العجائب العقارية أو ما يقال عنها الضرائب العقارية أو العوايد بتاعة زمان… مطالبات جائرة وتهديد ووعيد وتلويح بعروسة الجلد للمخالفين! هوه فيه إيه؟ إذا أردتم جباية قولوا كده إنما بالطريقة دي فهذا يدل علي الغباء الشديد والأمثلة كثيرة جداً ولا أحد يستمع ولا حياة لمن تنادي واسمعوا هأقول لكم علي حالة تجنن… حكاية راجل محترم من الطبقة المثقفة المحترمة اللي ضاعت وتاهت واندثرت… جمع مدخراته وباع اللي باعه وكون مبلغ يبني بيت له ولعياله علشان لما يطلع علي المعاش ويقل دخله يبقي مفيش أعباء سكن ويبقي عمل شقتين لأولاده يجوزهم فيهم لأنه راجل شريف لا سرق ولا نهب ولا ارتشي ولا تربح وبالتالي هيطلع علي المعاش يامولاي كما خلقتني ومعندوش إلا معاشه وآهي مستورة.
وحصل اللي حصل وبني بيت لنفسه وشقتين لأولاده وأتجوزوا وعاشوا في تبات ونبات وخلفوا أولاد وبنات.
وفجأة طلع المارد من القمقم وأصدر قراره القراقوشي بإخضاع الشقق وإخضاعها تحت مظلة العجائب العقارية واللي هيتكلم ياويله وسواد ليله… ونقوله ياجناب المارد ياجناب الوالي دي شقق سكن خاص ووحيد مفيش غيره ونبصم علي كده والقانون بيعفيهم من الضريبة… يقول لك إتظلم… إطعن… ماشي نطعن يقولك إدفع نصف القيمة أولاً!!
نقول طور يقول احلبوه… ياعم المارد إحنا معفيين… يقول أحلبوه.. قصدي ادفعوا نصف القيمة! نروح فين نيجي منين لا عارفين يدفعوا ولا عارفين يطعنوا ويتظلموا… فكروني بقصة الحمار اللي حاول يهرب من الغابة ولما سألوه بتهرب ليه من الغابة ياحمار أنت وأخواتك الحمير؟ قال لهم أصل ملك الغابة العقارية أصدر فرمان بقتل القرود! قالوا له وانت مالك هوه انت قرد انت حمار… قال لهم هاثبت له إزاي إني حمار… هيقوللي إدفع نصف القيمة علشان نثبت انك حمار مش قرد.
ودي قصة الحمار قصدي الراجل الشريف اللي بني شقه لنفسه وشقتين لعياله.
مصر للطيران
تذكرة الحج من القاهرة إلي جدة والعودة باثنين وثلاثين ألف جنيه ولو المدة أطول تبقي بخمسة وعشرين ألف جنيه! ده علي الدرجة السياحية… وأهو موسم والسلام… والسلام ختام.