زبائنها من المشاهير .. الأفوكاتو "نهى" من محامية لبائعة فسيخ

تنازلت نهى الصادق المحامية، طواعية، عن المهنة التى ظلت تحبها وأسست مشروعها الصغير لبيع الفسيخ, وقررت المغامرة ورفض الخوف من الفشل.

قالت «الصادق» فى تصريحات صحفية: «اشتغلت لمدة 7 سنين فى مهنة المحاماة وانتقلت لجدول الاستئناف وده بعد مرورى بمرحلتين، هما الجدول العام والابتدائى كتدرج فى المهنة، وسيبتها لما حسيتها مش مناسبة مع طموحى، لكن فى الوقت ده كنت محتاجة شغل يكون النزول فيه مش كتير خاصة بعد إنجابى أول طفل».

تابعت: «فكرت أعمل مشروع من البيت، لأنى بحب أشتغل، وأعمل كيان لنفسى، ففكرت فى الفسيخ لأنها أكلة محبوبة من ناس كتير، واكتشفت بعد كده أن الشغل فيها صعب إنى أثبت نفسى فيها، حاولت أتميز عن البياعين بأنى أهتم بنظافة الفسيخ وجودته كمان».

حاولت «نهى» أن تتميز عن غيرها فى مجال الأسماك المالحة، فاتجهت لطرح منتجاتها من المنزل بطريقة غير تقليدية لجذب أنظار الزبائن، حيث قالت: «عشان بحب شغلى أكتر من أى حد، بقيت ببيع منتجاتى على هيئة هدايا، يعنى أغلف الفسيخ بشريطة ستان حمراء على شكل فيونكة، والطريقة دى عجبت ناس كتير».

 استطاعت «نهى» أن تثبت نفسها

فى مجال بيع الأسماك المملحة، أونلاين، ولكن تواجهها بعض الصعوبات فى عملها والتى تحدثت عنها قائلة: «أى مشروع أونلاين، بيحتاج مجهود كبير عشان يثبت نفسه، وده كان مرهق جداً بالنسبة لى، لكن الحمد لله، بقى ليا زباين من المشاهير زى الفنانة بدرية طلبة والفنانة رنا سماحة والفنان مينا عطا، والمذيعة سالى عبدالسلام، لكن أحيانا بتعرض لانتقادات، زى انتى ليه سيبتى المحاماة وتشتغلى فى بيع الفسيخ، لكن بيكون ردى أن دى شغلانة تشرف أى حد وكفاية أنى من خلالها قدرت أحقق ذاتى».

وتحلم «نهى» بأن مشروعها يكبر، ويصبح لها زبائن من مختلف أنحاء الجمهورية، حيث قالت: «نفسى المشروع يتطور ويكبر، وأساعد كل ست مصرية نفسها تفتح باب رزق حلال وأعلمها الصنعة وتدعيلى».