رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

آه لو تسمعنى

 

 

< عايشين نسمع حكاوي وفتاوي وأخبار وشائعات.

< إعلام موجه من أكثر من جهة.. وكله اتلخبط علي كله ولم أعد أصدق أحد.. وكثير من ضيوف البرامج كل شين كان.. معرفش بيختاروهم إزاي.. وليه؟

< التجمل عمال علي بطال.. وشياكة المؤتمرات.. ومكاتب المقابلات.. والإعلام والحراسات والمخابرات.. وشغل التنصت والسيديهات.. والفيديو كليب والتجسس علي بعضه والافتراءات أصبحت مهنة وحرفة وقلة أدب.

< جري إيه؟.. أعداء الداخل أصبحوا أكثر من أعداء الخارج.

< أعداء الداخل منهم عايز المكاسب والمصالح.. ومنهم عايز دولارات الأجانب الطامعين في مصر ويدعون أنهم بيدربوا الشباب علي قال إيه.. الديمقراطية وشغل الانتخابات.

< هوه فيه ديمقراطية وإلا فيه انتخابات.. ربنا ينقذنا من الجواسيس بتوع التقارير والشيكات والشباب يا عيني بيفرح بكام ملطوش من فقرهم.

< أما الأباطرة بتوع التمويل يبنون القصور ويشربون السيجار الكوبي ويركبون السيارات الفارهة أم سواق متلمع، وبياكلوا السيمون فيميه والكافيار والفراخ البلدي.

< بعد أن كانوا شحاتين يتسولون من أسيادهم المحترمين عشرة وعشرين جنيه ويوصلوهم بالشنط السمسونيت.

< ديمقراطية وانتخابات.. إحنا من أول دستور 1923 متعلمين كل حاجة وفاهمين كل حاجة.. ولكن أرزاق للناس الخونة.

< أما أعداء الخارج معروفين ومعروف مشروعهم الشرق الأوسط الكبير في العدد والصغير والفارغ من المضمون.. حيث سيحول الدول إلي دويلات خاوية من كل شيء حتي تصبح إسرائيل هي الأقوي وزعيمة المنطقة سياسياً وعلمياً واقتصادياً وكل الدول تسرق مواردها كاملة وتغرق في التخلف والصراعات.

< مصر التاريخ والحضارة يتآمرون عليها.. والشعب تايه في الدوامة، ودخل علينا رمضان الكريم، متعرفش إيه اللي جري، الكل فرحان والناس بتجري في الشارع، ناس بتشتري ياميش بالغلا والكوا، بس ما تفرقش معاهم وناس كتير قوي بتجري لتحجز في موائد الرحمن.

< مصر فيها ناس مكوشة علي كل شيء وناس تانية بتاكل بالعافية حتي ولو من الزبالة ما تفرقش، أهو كل حشو بطن وقتل للجوع.

< لقد قضوا علي الطبقة الوسطي المحترمة.. رمانة ميزان المجتمع التي كانت عاملة لمصر قيمة وقامة في كل شيء.. يا عيني علي المصريين!

< صدرت الأحكام علي إخوان الشيطان، أعلنوا فوراً عن الانتقام والقصاص، احتارت الناس الجعانة والشبعانة أيضاً هل تمنع أولادها من الذهاب إلي المدارس وإلا لأ؟!.. نروح الشغل ولا لأ؟!.. حيرة نار نار.

< لو تسمعني يا سيسي.. حرام عليكم الناس زهقت وأنت حاسس بيهم التراخي في التعامل مع الخلايا النايمة اللي بتهددنا من تحت الترابيزة لابد من تصفيتهم، لقد حلقوا دقونهم فقط وشغالين وعيد وتهديد وقتل.. لابد من سجنهم.. صفوهم أفضل.. المجتمع كده مش حيقوم.

< الخلق اللي بيقولوا إن إخوان الشياطين انتهوا ناس واهمة لأنهم تنظيم عارف بيعمل إيه وله تمويل دولي.. وله صف ثاني من القيادات ومخترقين جميع المصالح ولابد من التطهير دول مش نايمين في العسل، زي وزراء الحكومة السنية اللي فيها 2 وزراء بيشتغلوا فقط وزير التموين ووزير الخارجية والباقي نايم في العسل ومحلب بيعمل اللي عليه في الجري والتفتيش المفاجئ.

< آه لو تسمعني يا سيسي.. مطلوب أيضاً الضرب بيد من حديد وبالكرباج للبلطجية اللي مهددة الناس وناهبة قوت الغلابة.. السلع والسكن والملابس والدروس الخصوصية واللحمة!

< المواطن حاسس إنك حاسس بيه من خطاباتك ولكنه يريد تفعيل ده علي الطبيعة عملياً فمازال الفقير يدفع الفاتورة وما حدش قادر علي النخبة وكثير من رجال الأعمال الخونة أباطرة مصر.

< الكرباج مع الخارجين علي القانون وتفعيل القانون والحرمان من كل شيء من أول الوزير حتي الغفير وأطفال الشوارع.

< لابد أن ينضفوا الشوارع والأحياء ترفع القمامة والطوب والرمل اللي في كل مكان.. عيب قوي القاهرة والجيزة والمحافظات المحترمة تكون بالقذارة دي.. ده لا يحتاج دولارات ولكن يحتاج إلي مدير محترم وغير فاسد وعنده قرار.

< أنا عارف أنت مش لاقي حد يقف بجانبك ويساعدك كله كرافتات نفاق وبدل حركات ومصالح وطابور خامس كلنا عارفينه.

< آه لو تسمعني يا سيسي.. النار تحت الرماد والناس بتحبك وعندها أمل ولكن يا ريس الجياع كتروا قوي وكذلك كتير قوي من الشباب فقدوا انتماءهم للوطن والأرض.. والإجرام أصبح مدرسة الحياة.

< آه لو تسمعني.

 

 

المنسق العام لحزب الوفد

رئيس اللجنة النوعية للثقافة والفنون