رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

سيادة الرئيس انقذ ما تبقى من كرامة

محسن سليم Saturday, 20 February 2016 21:12

ألو.. ألو.. رئاسة الجمهورية؟ معاك يا فندم ..معلش بتكلم في وقت متأخر..ممكن أكلم سيادة الرئيس...خير فيه إيه؟... فيه حاجة مهمة لازم أوصلها له شخصيًا، الموضوع خطير جدًا؟معاك على الخط..........قول يا ابنى فيه إيه قلقتني...................... سيادة الرئيس قالولك الشاب بتاع الدرب الأحمر مات خطأ، صح؟.. قالولك حالة فردية وكله تمام؟.. قالولك تم السيطرة على الموقف وأمين الشرطة هياخد جزاءه وتم التحفظ عليه في المستشفى وتحويله للنيابة وحبسه على ذمة القضية؟.. طيب قالولك إن 3 رصاصات في دماغه يعني ضربة موت "زي ما بيقولوا الصعايدة" مش خطأ؟ طيب صدقتهم يا ريس؟ قولي يا ريس صدقتهم؟.. طيب هنعمل إيه في أمناء الشرطة بقوا عبء على الداخلية يا ريس وبتشوه صورتها وبتزيد الاحتقان بينها وبين الشعب؟.. عارف إن فيه محترمين في الجهاز ودول فوق "الراس"، وكل المؤسسات فيها الصالح والطالح، بس متزعلش مني زادت قوي يا ريس الحالات الفردية؟ يا ريس الكرامة بس.. مش هقولك عيش ولا حرية، مش عاوز غير الكرامة كتير عليا.. يا ريس الناس زعلانة، ظروف اقتصادية مستحملين، وعلشان الإرهاب ساكتين، طيب هتسمح يساومونا الكرامة مقابل الأمن.. بعُرف مين يا ريس وبشرع مين؟.. الوضع محتاج وقفة جادة يا ريس وبأقصى سرعة لاحتواء الأزمة لوضع حد لتلك الحالات الفردية التي تنتهك الكرامة أولًا وأخيرًا.. قديمًا قالوا يا ريس "من أمن العقاب أساء الأدب".. وعندنا في الصعيد اللي يضرب عيل صغير من عيلة فلان الفلاني يبقى مقدّرش كبير العيلة، يبقى أساء للكبير .. مش أنت كبيرنا يا ريس ولا إيه، نقول لمين ونعيد لمين ونشكي لمين!!! دولة القانون على الكبير والصغير، ده أبسط الحقوق، بنقول كرامة مش عيش وحرية؟ يا ريس اطلع واتكلم وراضي الشعب بكلمتين، وقول مش هسمح دم أي مصري يروح هدر، ابن الدرب الأحمر كرامته من كرامة مصر، ومش هسمح بإهدار كرامة شعب انتزعها بعد ثورتين.. قول يا ريس، اعلن إجراءات صارمة لكل من ينتهك كرامة المواطن.. يا ريس الكرامة خط أحمر، أمن قومي، حائط صد كبير، بتتأكل مش هتصمد قدام الضربات المتتالية.

حاجة تاني يا ريس بالمرة مش عارف هكلمك تاني ولا لأ طالما تقبلت كلامي عن الكرامة هكلمك عن العيش يا ريس.. زعلان منك علشان الغلابة محدش فاكرهم ولا شايفهم يا ريس.. مبقاش فينا صحة نقول "تحيا مصر 3 مرات".. مش كرهًا في مصر يا ريس، لا سمح الله.. بس مصر شكلها مبتحبناش، لو بتحبنا كانت بقيت حنينة معانا شوية.. الغلا يا ريس بياكل في أجساد الخلق.. أقولك يا ريس الناس ماشية بتكلم نفسها، المعايش صعبة قوي.. عارف يا ريس من يوم ما افتتحت قناة السويس أنا كنت هناك معاك وأنت بتعطي إشارة البدء، يومها عيني دمعت وفرحت من قلبي، وكنت راجع القاهرة وأنا حاسس إني راجع من غزوة ومنتصر.. من يومها كل ما أشوف الحفل أفتخر بمصر، بس مش شايف فرحة من عيون الناس.. عارف يا ريس من كام يوم حزنت قوي لما شفت ركاب المترو بيتفرجوا على شاشة العرض على المحطة والحزن مالي قلوبهم، نظرة حسرة وانكسار وألم زعلانين من مصر اللي مش عاوزاهم ما هي لو عايزاهم كانت رضيت عنهم.. يا ريس مقصرناش ولا عمرنا هنقصر مع مصر.. بس البلد ليها صحاب، "ميكونش يا ريس مكتوب علينا نعيش مش متشافين ملناش حقوق بس علينا واجبات، طيب منين، أكلت إيه علشان أشرب عليه ميه زي ما بيقولوا الصعايدة".. "محدش بيقولك يا ريس إن فيه ناس بتبات من غير عشا، أه يا ريس وممكن عطشانة في بلد النيل، بس تبات من غير كرامة مكسور عينها صعب القهر يا ريس قوي" .. يا ريس أنا عاوز أضمن حقي، آه عاوز أضمن حقي وحق ولادي.. "الفساد مصمص عضام البلد مبقاش فيها حاجة يا ريس لبكرة"، محدش بيقولك .. طيب عارف طيب ساكت ليه؟ الفساد مبقاش للركب ده خنق البلد.. المحسوبيات يا ريس مبقاش حد يعرف يتحرك من غيرها هيداس يا ريس وكده كده مش متشاف، صوته واطي ملوش غير اللي خلقه.. يا ريس أنا مش هاكل أمن وأمان مش فارقة معايا زيد ولا عبيد فارق معايا الأمل اللي شايله على كتفي من سنين، ونفسي أخد حقي في بلدي.. طيب منين البلد ليها صحاب لو مكنتش من الفئات الأكثر أمانًا "مش هتعرف تعيش ياإما تطاطي" هينفع يا ريس نطاطي في بلد أنت حاكمها.. فعلًا ميصحش كده، عارف يا ريس بقيت أسمع كلام كتير من الناس إحنا رايحين فين؟! البلد ماشية في طريق والمسئولين بيتكلموا عن بلد تانية عن شعب تاني، طيب هما ناويين يجبوا شعب غيرنا ولا إيه؟ طيب يقولوا لنا نقدم طلب هجرة ولا نركب مركب هجرة غير شرعية هنجيب تذكرة الطيران منين!! .. عارف يا ريس المواطن نفسه بقى غير صالح للتعايش، الشعب بقى عنده مشاكل نفسية فوق الاقتصادية، بقى متعلق في ساقية علشان يعرف يعيش، وياريته عايش مستني يجي عليه الدور ويرتاح بس يا رب يلاقي مترين تراب يتوه في بلد معرفش يعيش فيها، الجوع كافر، وسعر التربة فيها مئات الآلاف ولا دنيا ولا آخرة حتى ليه كده؟.. هنستحمل بس لإمتى يا ريس.. حكومة ماسكة سوط وكرباج على رقاب الغلابة علشان تسد عجز موازنة... بيقولك يا ريس رئيس الوزراء بجس نبض الشارع وعاوز ياخد إجراءات صعبة بعضها مؤلم ..طيب ما أنت عارف مش هنتاخر بس مفيش اللي تحت البلاطة طلع في حفر القناة الجديدة، يعني مفيش.. أنا طبعًا مش هقدر أكلم الريس في التليفون بس هبعتله رسالة مع إني عارف إنه مش هيشوف رسالتي، ومتأكد من ده بس زعلان على بلدي اللي كنت بعيط لما بسمع أغنية وطنية في ذكرى أكتوبر لما بشوف علم مصر بيرفرف مصر غالية علينا وزعلانين عليها عاوزينها قد الدنيا.. كلمة أخيرة يا ريس إحنا راكبين معاك لآخر الخط مش هننزل ومعاك إيديك في إيدينا، بس حبة أمل لبكرة تدعمهم حبة إجراءات لصالح المواطن احمينا منهم يا ريس دول مش شايفينا ..يا ريس أنت قدرنا ونحن قدرك ولن يعينك الله علينا إلا ببطانة صالحة.. أنا مش بغلط يا ريس في الكبار ولا قصدي حاجة بس الرحمة حلوة يا ريس.. الغلابة يا ريس.. الكرامة يا ريس.. العدالة يا ريس... الفساد يا ريس.. المحسوبية يا ريس!!! انقذ ما تبقى من كرامة للمصريين.