ع الطاير
الطبطبة.. موجودة ومرطرطة وكمان يا باشا ممكن جدًا تلاقيها أون لاين يعنى فى العالم الافتراضى السوشيال ميديا وانت قاعد فى البيت ومن غير أى مجهود نفسى أو بدنى تلاقى الطبطبة فى صور كتير أوى وحبذا بقى لو فى كمان أكلة حلوة وشوية قرمشة عشان الفوود يا جماعة أكتر حاجة تعدل المووود وخصوصًا لو متواصل مع حد يقول لك كلام حلو أو يضحك معاك وبالصوت والصورة كمان وخلاص هى دى الطبطبة.
وطبعا إنت عارف إن كل شيء بقى أون لاين يعنى تعمل شوبنج وتدخل تتفرج وتنقى وتختار وممكن كمان تتفسح يعنى تشوف أماكن ومناظر وشواطئ وحمامات سباحة وتدلع نفسك وانت قاعد فى البيت وكمان ممكن تروح الجيم وتعمل كل اللى نفسك فيه.
يعنى مسألة إنك تلاقى الطبطبة بقت أسهل حاجة أون لاين دلوقتى حتى لو مفيش حد خالص معاك انت كده لوحدك مع نفسك ممكن تلاقى الطبطبة فى فيديو حلو فى أغنية فى حد بيقول حاجة ظريفة أو مفيدة وإنت براحتك عيش حياتك أون لاين ودور على الطبطبة.
والحقيقة بقى إن الأرقام القياسية اللى كشف عنها الجهاز القومى لتنظيم الاتصالات بخصوص استهلاك الانترنت الثابت والمحمول خلال الأيام اللى فاتت تعنى أن الناس زهقت من الخروجات والعالم الواقعى وأصبحت تفضل العالم الافتراضى فى السوشيال ميديا وأصبحت كلمة الفنان أحمد مكى فى مسلسل الكبير أوى يقطع النت ع النتيت.. ع اللى بينتتوا عليه هى العبارة الأكثر شعبية فى كل بيت من الأمهات للأبناء وطبعًا العيال الصغيرة نسيوا المدرسة والدروس ويمكن كمان افتكروا إنه خلاص مبقاش فى حاجة اسمها مدارس وأصبحت حياتهم أون لاين وبس.
وأرقام جهاز تنظيم الاتصالات بتقول لنا إن فى زيادة فى نسبة استخدام الإنترنت بنسبة 92% خلال «يونيه، يوليو، أغسطس»، وإن عدد الزيارات للمواقع خلال ساعة واحدة وصل إلى 52 مليون زيارة، وحجم البيانات المستهلكة 19 تيرابايت، خلال 60 دقيقة، إنت متخيل يا مان، مش بس كده وكمان بلغ عدد الرسائل الفورية 3 مليارات رسالة، شوف دلالة الرقم ده تعرف إن الطبطبة كلها هنا فى العالم الافتراضى السوشيال ميديا.
وفرفش وزقطط