ع الطاير
لو حد فى خدمة العملاء فى أى شركة قال لك اقفل الراوتر وافتحه تانى أوعى تزعل أو تتضايق بهدوء كده اقفل السكة بس قبل ما تقفل قول له الوزير قال إن الكلمة دى مش ح نسمعها تانى أبدًا وإن مشاكل الانترنت فى مصر انتهت وإن السرعات بقت عالمية والكابستى كمان.
والحقيقة أن سيادة الوزير الدكتور عمرو طلعت وزير الاتصالات وتكنولوجيا المعلومات فى شرم الشيخ كان فى تصريحات صحفية على هامش مؤتمر البريد الدولى، قد تعهد بالقضاء تماما على مشاكل الإنترنت فى مصر وقال بالحرف كده وبكل ثقة: لن تسمعوا عبارة اقفل الراوتر وافتحه مرة أخرى.
وقال الوزير كمان إن جهود الدولة فى تحسين خدمات الإنترنت كبيرة وإنه واخد عهد على نفسه أن المصريين مش هيسمعوا تانى جملة «اقفل الراوتر وافتحه تانى».
وقال كمان إن متوسط سرعات الإنترنت فى مصر كان ٤٫٥ ميجا خلال عام ٢٠١٨، لكن خلال ٢٠١٩ وصل متوسط السرعة إلى ٩٫٥ ميجا، وهيوصل بنهاية العام إلى ١٥ ميجا.
وقال أيضا فى خطة اسمها «أربعين عشرين»، يعنى متوسط سرعات الإنترنت المنزلى فى مصر هتبقى ٤٠ ميجا بحلول عام ٢٠٢٠، علشان كده سيادة الوزير بيعمل اجتماعين تقريبا كل أسبوع علشان يتابع الخطة دى بنفسه.
الوزير أكد أن الدولة خلصت الجزء الخاص بمد الفايبر لأقرب مكان من المنازل يعنى الخطوط الرئيسية إنما دلوقتى المشكلة فى السلك اللى طالع من البوكس لحد الراوتر، علشان كده هيتم التنسيق بين المصرية للاتصالات ومجموعة من الشركات الخاصة علشان يعملوا زيارة للمنزل ويغيروا السلوك ويظبطوها ويغيروا الراوتر كمان ببلاش عشان الراوتر القديم مش ح يستحمل السرعات الجديدة.
يجب أن نحيى جهود الدكتور عمرو طلعت وزير الاتصالات وتكنولوجيا المعلومات فى رفع كفاءة شبكة الإنترنت فى مصر وتعميم خدمات الإنترنت فائق السرعة، ولكن يبقى دائما أن السيف أصدق أنباء من الكتب، يعنى لازم الناس تشوف الكلام ده واقع وليس مجرد تصريحات ونحن نثق فى كلام السيد الوزير.