إشراقات
بعد أن ارتفعت أسعار الكهرباء.. واشتعلت فواتيرها حتى أصبحت كالسوط السودانى.. الذى يلهب ظهور المواطنين.. بعد ذلك كله لم تكتف الحكومة بذلك..وإنما يتعرض المواطن الغلبان لما هو أبشع من ذلك.. وهى عملية سطو ونهب منظم لأمواله.. عن طريق فاتورة الكهرباء!!
والآن تعالوا لنقرأ ما كتبه أحد الأصدقاء.. على صفحته الشخصية على «الفيس بوك» حتى نحتاط ونفهم.. وﻻ نتعرض لعمليات السرقة والنهب المنظم.. فى فاتورة الكهرباء يقول المواطن:
( تحذير هام للغاية حول فواتير الكهرباء..)
يا جماعة فى حاجة مهمة جداً كلنا لازم نعرفها وده بخصوص «إيصال الكهرباء».. يمكن كلنا ملاحظين.. عن المحصل بيضرب كده كام شهر على بعض ما ينزلش.. وييجى بعدها يحصل منك الشهور.. اللى غابها مرة واحدة وهنا خلـى بالك، الشهر اللى المحصل مجاش فيه.. بيرجع الإيصال للشركة.. على أساس الجرد الشهرى.. فتقوم الحسابات تعمل «باند» للإيصال وتبدأ تنزله عليك على هيئة.. أقساط فى الشهور اللى بعد كده، تقوم انت حضرتك أول مايجى المحصل.. تجرى تسدد الإيصالات كلها.. اللى خد «باند» أو الجديد.
شوف بقى الإيصال الجديد.. هتلاقى خانة فوق على الشمال اسمها «رصيد أقساط»، هتلاقى نازل فيها قسط عليك.. اسأل المحصل عليها وشوف إجابته عليك هتكون إيه.
يعنى بكل بساطة حضرتك بتسدد الإيصال مرتين.. وانت مش عارف ولا دارى.. على فكرة يا جماعة الموضوع ده.. حصل مع ناس كتير أوى أنا أعرفهم.. واللى مش مصدق يروح الشركة يسأل على الكلام اللى بقوله ده، اللى يلاقى بند فى الإيصال (رصيد أقساط عليه) يتفضل يروح الشركة ويعرف الأقساط دى بتاعت شهر كام؟ ويدفعها بالكامل وخلى بالك.. الشركة هتقولك مثلاً ده أقساط خاصة بشهر 11 مثلاً، فانت هتشوف الإيصالات اللى عندك فى البيت فيها شهر 11 ولا ﻷ؟
لو لاقيت نفسك دفعت شهر 11 أصلاً ومعاك الإيصال تقولهم أنا سددته وانتوا بتحصلوه منى على أقساط تانى ليييييه؟ وتخليهم يخصموا الفلوس اللى دفعتها من الفواتير الجديدة.
إلى هنا انتهى تحذير المواطن الكريم.. وعلينا أن نضع أعيننا -فى نص رأسنا كما يقولون- عند ورود أى فاتورة كهرباء.