حوار مع نونو!

جرس التليفون بيرن.. إيه ده رقم غريب.. مش تبع أى واحدة من شركات المحمول التلاتة.. فتحت الخط:
< ألو.. مين معاى؟!
<< ايوه ياعم عصام أنا نونو.. وبكلمك من جوه بطن امى!!
< إزيك ياعم النونو.. إيه الحكاية بقى..انت لسة فى بطن امك من زمان.. ولسة ما نزلتش لغاية دلوقتى.. انت سبق وطلبتنى قبل كدة؟!
<< أيوه يا عم عصام..مانزلتش.. ومش عايز انزل كمان.. وباقى يومين وانزل غصب عنى.. حتى لو نزلونى بعملية قيصرية!!
< طب خلاص ما باليد حيله.. انزل يابنى وأجرك على الله.. حتى عشان تشيل معانا نصيبك من ديون مصر.. إنت هيبقى عليك على الأقل ٤٠ ألف جنيه!!
<< إيه ياعم عصام الهبل ده.. أنا لسة أكلت ولا شربت عشان تحملونى بديونكم وتشيلونى خيبتكم.. أنتم هتقلبونى م الأول كدة.. عمومًا سيبنا من كل الكلام ده.. بس والنبى انا لية خدمة عندك يا عمو!!
< أؤمر يانونو.. ولو انى زعلان منك من المرة اللى فاتت.. لانى قلت لك خدنى جنبك فى بطن الست الوالدة.. فقلت لى خليك فى الدنيا المهببة بتاعتك!!
<< ياعم اخدك معاى فين.. ده الدنيا فى بطن أمى بقت خرابة خالص.. خصوصا بعد موجة الغلا اللى ضربت البلاد والعباد فى مصر.. لا أكل كويس..وﻻ شرب كويس.. والانيميا هتموتنى انا وأمى!!
< خلاص طلباتك إيه يا عم النونو؟!
<< عايزك تقنع أمى أنها تسافر إلى أى دولة أخرى.. عشان أتولد فيها..وأخد جنسيتها.. وأتمتع بنعيمها.. زى ما رجال الأعمال والفنانات بيعملوا كدة.. وكمان بعد فترة ممكن أدى الجنسية المفتخرة دى لابويا وأمى كمان.. عشان يعيشوا بدل ماهمه مش عارفين يعيشوا..فى ام البلد دى.. دول حتى مش عارفين يموتوا.. لانهم مش معاهم حتى مقبرة ملك.. يعنى آخرهم مقابر الصدقة.. بعد عمر طويل!!
< أخص عليك نونو.. عديم الوطنية.. مش عاجبك جنسية بلدك.. انت مش عارف.. الزعيم الوطنى مصطفى كامل.. قال لو لم اكن مصريا.. لوددت ان أكون مصريًا!!
<< صرخ النونو وقال يا عم ارحمنا.. من ميتين ام الشعارات بتاعتكم دى.. ده لو مصطفى كامل بتاعكم ده كان عايش بينا دلوقتى.. كان زمانه أخد جنسية بنجلاديش!!
< على فكرة يا نونو.. انت كده بكل سهولة.. ممكن أى حد يقول عليك إخوان.. وكاره البلد ونظام الحكم فيها.. وممكن تتهم كمان بالتحريض على قلب نظام الحكم فى البلاد!!
<< يا عم حرام عليك يا عم عصام.. انت شغال مع أمن الدولة وﻻ إيه.. هتودينى فى داهيه.. وانا لسه فى بطن أمى؟!
< طب سيبنى أفكر شوية.. وهقولك نتصرف إزاى فى الوحلة دى يا عم النونو!!
<< بس والنبى بسرعة الله يخليك.. لأنك لو اتأخرت شوية.. هتلاقينى فى بوذك.. واخد جنسية بنى سويف!!