هشام ماجد يقارن بين الهندسة والتمثيل: "المهندسين شايفين نفسهم وفيهم أغبياء"
قارن الفنان هشام ماجد بين مهنة الهندسة، حيث تعلم وعمل بالتمثيل، حيث احترف فيما بعد، قائلاً: “من صغري نفسي أبقى مشهور، كنت بتفرج على اللاعيبة والممثلين، وأقول نفسي أبقى مؤثر أوي”.
وتابع: “اكتشفت موضوع التمثيل متأخرًا ودخلت هندسة، ومكنتش محتاج التمثيل ماديًا، المهندس بيبقى شايف نفسه فوق الناس، رغم إن هما ناس عادية جدًا، وفيه مهندسين تعبانين وأغبياء”.
وقال هشام ماجد، خلال استضافته ببرنامج "أسرار" مع الإعلامية أميرة بدر المذاع على قناة النهار: "مصطفى غريب شاطر وبيستغل الفرص الحلوة، وكان دوره صغير وعمل لنفسه مساحة كبيرة، وعدد مشاهدة كانت أقل من كده، وابتدى يطلع لزمات وسكة للدور، والأستاذ خالد وشيرين سابوه يعمل كده".
وكشف رأيه في الأعمال الفنية الحالية قائلًا: "بكره الأعمال اللي بيبقى فيها نجم وكله بيخدم عليه، بحب كل الموجودين له لازمة ومهم في المشهد، وبحاول أعمل كده، وده بيدي للعمل قيمة أكبر، بيبقى فيها هات وخد، يعني لو شفنا فيلم الناظر كلهم بيضحكوا وليهم لازمة، ومكتوب صح والمخرج شريف عرفة بيوزن الفيلم".
شهوة شراء الأحذية:
كشف: “شهوتي شراء الأحذية وساعات بيبقى مالهاش لازمة وأنا وعمرو سلامة فينا الموضوع ده، عندي حوالي ٦٠ جزمة وحاططهم على الأرض، ومراتي بتضايق من ده، بقف في المراية كتير وأتأكد إني كويس”.
وأكمل: “مبشوفش نفسي حلو وكتر خير اللي بيشوفني حلو، مبحبش تغيير الشكل والعمليات، إلا لو عندك عيب مضايقك أوي، مش زعلان عن أحمد فهمي عشان أعاتبه، وهو بيكلمني كتير، وأنا اللي مقصر معاه، وطالع معاه ضيف شرف، وأنا عندي فيلم في العيد، اسمه ”فاصل من اللحظات السعيدة".
عشق الزمالك:
علق على أقاويل أمير مرتضى منصور على صفقات الزمالك، قائلًا: "أمير مرتضى بيهزر وأحمد مدبولي أنا قلتله كويس، لكن الصفقات مبتتعملش كده، وفي الفترة دي جابوا لاعيبة كويسة، عبدالله السعيد، لاعيب كويس، وكان ناقص الزمالك، وبحب فتوح وزيزو ومثلوثي".
وأردف: "نفسي أشوف عبدالمنعم في الزمالك، ومروان عطية وعلى معلول وإمام عاشور والشناوي، بشجع الزمالك وبحترم الأهلي، وبحب اتفرج على مدحت شلبي ورضا عبدالعال وميدو وشوبير وإبراهيم فايق وعبد الجواد، بحب السينما والكورة لكن مبفهمش في السياسة، وأكتر حاجة بحبها بناتي وعيلتي، وبعدهم شغلي".
