اوعوا يا أهل الرياضة تصدقوا ان فيه حاجة اسمها التدخل الحكومى أو التدخل الأوليمبى مفيش حاجة من هذا القبيل خالص الدنيا وردى وبمبى كمان والرياضة استقلت تمامًا وأصبحت مقاليد الأمور بيد الجمعيات العمومية للأندية والاتحادات الرياضية..
وإن وزارة الرياضة تخلت عن كل سلطاتها وهيمنتها وتفرغت لنشر الرياضة للجميع ورعاية النشء والشباب والبنية الأساسية الرياضية والشبابية!!
وإن التصنيف للهيئات التى حصلت على النسبة فى المشاركة بالأنشطة وأصبح لها الحق فى التصويت والانتخاب يتم بمعرفة الهيئات ذاتها!! ولا تدخل نهائى من أى جهة أخرى..
بتقولوا ايه؟؟ كذب فى كذب... لأ حرام عليكم بدل ما تشكروهم على عدم التدخل بتفتروا عليهم.. أكيد أنتم ظالمين الناس أنتم لا يعجبكم العجب فيها ايه لما تبقى الحنفية فى إيد الوزارة.. اللى ما يسمعش كلامها تتقفل الحنفية ومفيش ولا مليم واللى يسمع الكلام نفتح الحنفية وأمره مجاب.. بالذمة ده تدخل يا متعلمين يا بتوع المدارس؟؟
وللا الانتخابات دى بقت حدوتة أخرى لها العجب.. الاتحادات أصبحت بالتعيين اللى دمه خفيف يبقى معانا واللى دمه تقيل يبعد عننا.. فيها ايه دى كمان بنوفر عليكم تعب الانتخابات وبلاويها بدل ما تبوسوا إيديهم تظلموهم وتقولوا تدخل والله عيب عليكم مش عاجبكم الديمقراطية بتاعتهم بطلوا رياضة وكل واحد يشوف له حاجة تانية يتسلى بيها مالها القهاوى والطاولة والدومينو والكوتشينة والشيشة كمان.. اطمئنوا مش هيعملوا اتحادات لها، كل ما هناك ان القعدة بالمشاريب وللا انتخابات ولا تصنيف ولا وزارة ولا اوليمبية ولا دعم ولا حنفيات ولا تدخل ولا أى قيود خالص وأنشطة كتيرة تقدروا تلعبوا طاولة محبوسة أو عادة اللى أنتم عايزينه.. وتنقوا نوع الشيشة اللى أنتم بتحبوها.. فيه أكتر من كدة ديمقراطية وعدم تدخل.. بطلوا افتراء على الناس.
يعملوا لكم ايه أكتر من كدة.. وانا عن نفسى أوعدكم ان مفيش حد هيقرب منكم.. وإذا حصل.. عندكم صاحب القهوة اتظلموا له والمعلم معندوش خيار وفاقوس.. وكله هياخد حقه.. وبلاها رياضة.. خلاص راحت.. واتمسوا بالخير.