شواكيش
> عندما أدرك «صحصاح» سطوع شمس الصباح.. استيقظ من نومه فى ارتياح.. داعياً ربـه الفتــــاح أن يبدأ يومه بالتوفيق والفـلاح!!
> وبدون مقدمات.. لبى الابن «صحصاح» دعـــوة والــده الدكتــور «نحناح» لتناول إفطار الصباح داخل حديقة فيلـــته المحاطة بسياج شـجر التفـــــاح.. وبعد أن أحتسى الأب «نحنــــاح» مشروب الصباح.. نظر بعين العطف والارتيااااح إلى ابنه «صحصاح» لكى يحكى له الأمور فى انصياع!!
> وفى نبرات مرتعشة وجه الابن «صحصاح» ســؤالاً خاطفاً إلى والــــده الدكتور «نحناح» الذى تراوده منذ فترة.. العيشة داخل قصور البغــــددة والارتيـــااااااااح!!
> الابن منشرحاً: «كفر الطمبشاوى» رااايحة على فيـن يا بابا؟!
> الأب واثقاً: طبعا رايحة على محــور «المريوطية»!!
> الابن منزعجاً: بس يا بابا المحــور محــــاط بسياج من الأشـــواك؟!
> الأب متنحنحاً: علشاااان كده يا «صحصاح».. دعـــــوت أمبـــــارح فى مقـــام ســـــيدى «أبو الكرمات» يتغيــــــــــر مســار «السياج الشوكى» ونويت أرشح نفسى لعُمدية «كفـر الطمبشاوى» ليكوووون زيتنـــــــااااا فــــــى دقيقنــــا!!
> الابن مبتسماً: نااااااوى تعمل إيه يا بابا؟
> الأب هادئـــاً: طبعا نـاااااوى ألعب ســــــياسة «الشوكة والجزرة»!!
> الابن متعجلاً: قلت يا بابا أن 42% من شعب «كفر الطمبشاوى» يعيشون على أقل من ست أرغفة فى اليوم؟!
> الأب متأثراً: يا حـــــــرااام.. علشان كده نااااااوى بعد سنوات الحرمــان دى أبغددهم وأنيمهم على ريش نعام وأكـلهم لحم غــــزلان!!
> الابن غاضباً: شوفت يا بابا عيشة الغلا وأزمات السولار والبوتاجاز اللى كانت فى «كفر الطمبشاوى» اليومين اللى فاتواااااا؟!
> الأب يمتص غضبه: علشااان كده يا ابنى «صحصاح» ح يكون من ضمن برنامجى الانتخابى أنبوبة بوتاجاز وجركن سولار وكيلو لحمه من بيت اللوح وربع كيلو كبــــده من البعرور.. لكل مواطــــــن «طمبشاوى» يمنحنى صوتـــــه بكل ســـرور!!
> الابن فى براءة متحفزاً: هـل أنت راض عن عيشة الناس فى «كفـــر الطمبشاوى»؟!!!
> الأب متحسراً: طبعااااا.. إنا مش راضى ولكن إحنا منتظرين التغيير!!
> الابن باسمـاً: هل هناك علاقة بين محور «المريوطية» والانتخابات الطمبشاوية اللى جاية؟!
> الأب منشكحاً: طبعا «المريوطية» هى المحور العرضى للوصول إلى بيت العُمدية الكبيييير!!
> الابن فى فضول: نااااوى خلاص بقى يا بابا ترشـــــح نفسك فى الانتخـابات «الطمبشاوية» اللى جايه؟
> الأب مراوغاً: مش بالضبط كده يا صحصاح يا ابنى!!
> الابن قلـــقاً: مش فاهم حاجه خاااالص يا بابا؟!
> الأب هـادئاً: افهم بقى ســــياســـة يا «صحصاح».. اللى باعمله دلوقتــــى «حراك سياسى» فى «كفر الطمبشاوى».. وعلى العموم أنا عارف كويس من النهاردة نهاااايتها إيه؟!
> الابن فى إلحاح: نهاااايتها إيه.. نهاااااايتها إيه؟!
> الأب مستكيناً: أنا شخصيا مؤمن بالمثل القدرى: «اجرى يا ابن آدم جرى الوحوش.. غير كرسى عُمدية (كفـــر الطمبشاوى) لن تحوش»!!