شواكيش
> ألووووووه.. مين بيتكلم؟!
- أنا واحد من الشعب!
> تؤمر يا شعب؟!
- يا «سى سماعين بيه» أنا واحد من الشعب من الغلا بيلالى.. ومن خفض الجنيه بيعانى.. ومن رفع الدولارآآآآآآه يانى!!
>.. وإيه تانى من الأزمات يا شعب؟!
- دى أزمة السكر ماكانتش على بالى.. ودلوقتى اضطريت أشرب كُبّاية الشاى بالسُكر المُر!!
> عايزك تستحمل يا شعب.. ده أنا اللى قعدت أشرب ميه من الزير عشر سنين.. ولسه مستطعم المُر!!
- يا «سيدى البيه» ما إحنا شربنا برضُه من ميه الزير المُر.. ولحد إمتى هنشرب مع حكومتك العسل المُر!!
> شوف يا شعب.. زمااااان قالولك: «شد الحزام».. وإحنا دلوقتى بنقولك: «فُك الحزام» علشان اقتصاد البلد على «كف عفريت الدولار»!!
- يعنى بصريح العبارة يا بيه: الدولار طالع واكل ونازل طحن فى الجنيه.. وإحنا الشعب اللى بنموت كل ليلة من الجوع!!
> قُلتلك: استحملنى يا شعب.. قُدامك تلات سنين.. وهتبقى عيشتك معدن والحياة فُللى!!
- يا حلاوة السٌكر والعسل المُر.. العيشة هتبقى معدن والحياة فُللى بعد تلات سنين.. بس لا مؤاخذة يا «سى سماعين بيه» مش مصدق كلامك!!
> أيوووووه يا شعب.. لازم أحلفلك بسماهها وترابها علشان تصدقنى!!
- بسمع كلامك أصدقك.. أشوف الغلا أستعجب وأمشى فى أسواق البلد تلسعنى نار «محرقة الغلاء»!!
> بتقول يا شعب: «محرقة الغلاء» يا حرااااااام.. يا نور عينى!!
- إحنا الشعب نأمر.. والحكومة تستجيب!!
> تؤمر يا شعب.. أحلامك أوامر!!
- الشعب يأمر برحيل حكومة الغلاء!!
> (بنرفزة): مين إنت؟!
- أنا خريج « التوك التوك» اللى فوضنى الشعب أقولك: اررررحل!!
آَخِر شَوْكَشَة
> > على طريقة غناء فنان الشعب سيد درويش: «علشان نِعلا ونِعلا ونِعلا.. لازم نطاطى نطاطى نطاطى»!!
يا ترى الدنيا حتروق وتحلى.. ولا هتبقى من السيول طينة ووحلة.. وأشوفكم بكرة حلوين وأحلى!!