جلس الثورى على الكافيه عاقدا شعره بونى تيل، يرتدى التى شيرت النيكى والحذاء الأديداس والجينز البوس، يدخن شيشه تفاح ويخرج من جميع فتحاته دخانها، ونظر إلى الجيرل فريند الثورية التى تُخمس معه فى الشيشة نظرة ثورية هامسا: هى البلد الوسخة دى موش بتقع ليه؟ لازم بكره نعمل فعالية نطالب فيها بإسقاط النظام، ونعلن فيها أن الثورة مستمرة! نظرت إليه الجيرل فريند نظرة عتاب وهمست: بس إحنا بقالنا خمس سنين وأنت بتأجل تقابل مامى علشان نتخطب، وبتقول لى لازم الثورة تحكم! تفتكر فاضل كتير؟ رد بسرعة البرق: حبيبتى لازم نحقق أهدافنا علشان لما نتجوز يبقى الاحتفال احتفالين: نجاح هدم البلد الوسخة ونجاح قصة حبنا الثورى! غمضت البنت عينها لتحلم بتتويج قصة كفاحهم الثورى وهى ترتدى الفستان الأسود الذى قامت بشرائه لهذا الاحتفال أبو روحين، وقالت: إيه رأيك فى قصة تيران وصنافير؟ نظر لها نظرة احتقار وقال لها بحزم: أنتى ها تهلوسى زى المغيبين عبيد البيادة، ده وقت نميمة على صحبتك والبوى فريند بتاعها؟ ردت بسرعة حتى لا يكتشف المحيطون جهله: لا دى الجزر إللى السيسى عمل اتفاقية مع سلمان علشان السعودية تستعيد الجزيرتين بعد ما كانت سيباهم تحت الحماية المصرية، وبعدين قوات حفظ السلام. قام من مكانه كثورى ننوس عين مامته والقشعريرة تبدو على كل ذرة فيه حتى البونى تيل بيتمرجح زى المرجيحة من تحت لفوق، وقال لها وإزاى تكون فيه حاجة نقدر نعمل بها فاعلية ثورية لإسقاط البلد الوسخة دى وما تقوليش؟ فتح التليفون الآى فون 6 وبعت برسالة لأصحابه وصحباته ننانيس عين مامتهم إن فيه بكرة فاعلية ثورية والكود: «عواد باع أرضه، يسقط حكم العسكر، الثورة مستمرة». رجع الثورى والثورية ننانيس عين مامتهم بالعربية الجديدة إللى بابى اشتراها موديل 2016 بعد ما كسب فى صفقة بيع البوكسرات الصينى اللى استوردها، وضرب فيها شهادة المنشأ وسعر المنتج وقدر يهرب من الضرايب ويكسب 100%، وقبل بيت الجيرل فريند الثورية، وقفوا عند كمين تأمين الطرق وعدوا فى سلام وأمان وكملوا السكة على الدائرى من غير ما حد يقطع عليهم الطريق ويقلبهم ويغتصب الجيرل فريند وحبيبها الثورى! المهم وصلوا لبيت الننوسة وباسته فى خده وقالت له بدلال: أكتر حاجة بحبها فيك يا بيبى إنك ثورى فظيع دا إحنا هنخلف نونوهات ثوريين؟ ابتسم الثورى ننوس عين مامته، وقال لها الثورة مستمرة يمكن تفهم حاجة؟ رجع الثورى ننوس عين مامته لقى مامى محضره عشا ومكشره هى وبابى، فيه إيه يا ثوار؟ هو أنت هتفضل قاعد على الكافيه وسايب البلد الوسخة دى من غير ما تقع؟ لأ إحنا محضرين بكرة لفعالية ثورية جديدة ؟ هتهتفوا بإيه؟ «عواد باع أرضه، يسقط حكم العسكر، الثورة مستمرة». بابى ومامى فى نفس واحد: «الثورة لازم تحكم» يلا اتعشى وقوم نام علشان بكرة هيبقى يوم ثورى طحن وكله مفاجآت؟
استشارى جراحة التجميل