تحية لك من واحد مصرى واكيد فيه ناس كتير يشاركونى الرأى انت بحق الرجل المناسب فى المكان المناسب بل انك تستحق اكثر مما انت فيه.. ياريت اشوف باقى محافظين المحروسة شايلين الهم مثلك لابس اڤرولك ونازل تلف وتدور يمين وشمال وتعمل اتصالات لكل فج عميق علشان تعيد النشاط والحركة السياحية وتدفقها لشرم الشيخ ومدن جنوب سيناء السياحية مثل سانت كاترين ودهب ونويبع وطابا.. سياحة دولية ماشى.. سياحة داخلية مفيش مانع.. بطولات رياضية محلية وافريقية ودولية هات.. مؤتمرات نظم.. حامل هموم الدنيا كلها فوق دماغك همْ الفنادق الفاضية والعمالة المتوقفة وأعباء شركات السياحة والقرى السياحية.. انت ناقص تنزل تكنس وتنضف شوارع شرم الشيخ.. ياريت الدولة تعمل دورة تدريبية للمحافظين الآخرين اللى اكتر حاجة بيعملوها انهم ما يلبسوش كراڤته فى المناسبات اللى بيحضروها فى محافظاتهم!!! قال يعنى ملبوخين وبيجروا ورا مصالح محافظاتهم.. صدقونى مش اكتر من قلع الكرافتة.. يجيبوهم لك يتعلموا منك يمكن يتحركوا ويسيبوا المكاتب وينزلوا الشوارع... فى بلاد بره بيسموا المحافظ العمدة ايوه زى عمدة بلدنا كده بس على كبير.. عارفين يعنى ايه عمده ؟ يعنى كبير المنطقة مسئول عن ناسها وزرعهم وقلعهم حتى اللى بتزعل من جوزها تروح تشتكيله.. يعنى بالبلدى من الابرة للصاروخ.. ناس بلده وأحوالهم فى رقبته هيتحاسب عليهم شاف احوالهم وللا لأ راضى ربه وضميره وراعى ربنا فيهم وللا قصر فى حقهم.. صدقونى حساب عسير بس اللى يفهم!!
الكلام ده ينطبق على الوزراء اللى مقضينها منظرة ووجاهة اجتماعية ومعالى الدكتور اللواء المهندس اللى اللى الوزير.. معاليه راح ومعاليه جه واديها ياتصاوير وجرايد ومجلات وتليفزيون وآهى ايام وبتمر وبتعدى وآدينا أخدنا رتبة ولقب الوزير.. ياناس ياهوه شدوا حيلكم خلليكم قدوة للنظام بوزاراتكم ومحافظاتكم لو مرؤوسيكم شافوكم زى النحلة هيختشوا على دمهم ويشتغلوا ويشوفوا مصالح الناس وفى الآخر المصريين مفاتيحهم معروفة ولو شافوكم بتراعوا ربنا فيهم هيشيلوكم على دماغهم حتى بعد ماتتكلوا وتسيبوا مناصبكم إما هيقولوا ياسلام الله يكرمه الوزير الفلانى او المحافظ العلانى كان راجل محترم يمسيه الله بالخير او الله يرحمه أو هيقولوا راح الله لا يسامحه ودى طبعًا اخف عبارة هيقولوها.. كلامى وتحيتى لمحافظ جنوب سيناء اللواء خالد فودة اتمنى ان يكون حافزًا لكل مسئول فى بلدنا علشان البلد تشد حيلها وتتعافى وتقاوم وتقف قدام تحديات من برة ومن جوة..
مصر حماها الله ستقف بسواعد ولادها لا بالمعونات ولا بالمساعدات بل بشغلنا واخلاصنا... وعلى رأى الفنان الجميل الراحل محمد نوح..
مدد مدد.. شدى حيلك يابلد..
وصبحكم ومساكم الله بالخير ياولاد بلدى...