المؤلف إسلام يوسف: السينما تاريخ وأخوض دراما رمضان 2023 بمسلسل إسكندراني (خاص)
إسلام يوسف، مؤلف وكاتب مصري موهوب لاقت أعماله الأولى نجاحًا كبيرًا بين النقاد والجمهور، جعلته يحجز لنفسه مقعدًا بين كبار المؤلفين، قام بكتابة السيناريو والحوار لمسلسل الصقر شاهين عام 2013، من بطولة تيم حسن، وإخراج عبدالعزيز حشاد، الذي شهد ثاني تعاون معه في مسلسله الجديد "عالم تاني"، من بطولة النجمة رانيا يوسف.
اقر أ أيضًا..لبنى عبد العزيز تُبهر روّاد مهرجان القاهرة السينمائي 44
كشف "إسلام يوسف" خلال حواره لــ "الوفد" عن أعماله القادمة مع كبار النجوم.
وإلى نص الحوار:"
متي عملت بالحقل الفني وكيف كانت البدايات؟
- بدأت وأنا صغير، واتعلمت السيناريو والحوار أثناء دراستي في الجامعة بكلية الحقوق، بس كنت بكتب شعر وقصص، واللي وجهني لموضوع الدراما السيناريست الكبير والشاعر الكبير الله يرحمه طه حسين سالم، هو اللي علمني أزاي أكتب دراما.
وكانت البداية الفنية الأولى خالص مع المخرج أحمد عبد الحميد المخرج، وكان وقتها هو المساعد لوجيه وجدي الله يرحمه، ولكن المشروع الأول متكتبش له إنه يظهر، البداية الحقيقية والبداية الفعلية كانت مع عبد العزيز حشاد سنة 2011، لما رشحني أكتب مسلسل الصقر شاهين مع فؤاد المغربي وإبراهيم حسن، ودي كانت البداية الحقيقية اللي شافت النور مع الفنان تيم حسن ورانيا فريد شوقي وشيري عادل وأحمد خليل وأحمد راتب الله يرحمه وعايدة رياض وكانت مجموعة كبيرة ومميزة من الفنانين.
ما سبب قلة أعمالك ولماذا هجرت الدراما 11 عامًا؟
- لم أبتعد ولكن من بعد 2011 كان في أكتر من مشروع حوالي 3 أو 4 مشاريع، ولكن للأسف متكتبش لها أنها تشوف النور، وبعدين أنا انقطعت؛ لظروف خاصة، خلتني أبعد شوية عن المجال، وكان في مشروع قيد التنفيذ اسمه منحنى خطر مع مصطفى قمر، ولكن توقف في اللحظات الأخيرة، ورجعت في 2022 مع رانيا يوسف وعبد العزيز حشاد في تاني تجربة ليا معه، بمسلسل عالم تاني.
ما هي أبرز الصعوبات التي واجهتها؟
- الصعوبات كتيرة ولكن الصعوبة الأولى اللي بيواجهها أي كاتب، هو أنه يثبت نفسه أو يلاقي حد يأمن بشغله ويأمن باللي هو بيكتبه؛ لأن الوسط بيعتمد شوية على اللي أعرفه أحسن من اللي معرفوش، ولو روحت لأي حد بدون سابقة أعمال بيبقي صعب جدًا أنه حتى يبص في العمل مهما كان متميز ومهما كان قوي، فلازم حد يقدمه أو يتبناه في البداية، تاني حاجة الموضوع مش الشلالية على قد ما هو موضوع التوافق بين الكتاب والنجوم؛ لأن لو النجم اتعامل مع الكاتب وارتاح معاه في المعاملة الأولى مبيرضاش يغيره، بيستمر معه لكذا عمل متتالي فبيبقوا كابلز، فده بيقفل الباب على الكتاب الجدد؛ لأن النجم هو اللي بيختار الكاتب.
هل كاتب العمل له الحق في اختيار النجم أو ترشيح اسم بعينه يراه مناسب لأداء دور معين؟
- لو النص هو الأساس ممكن، لو إحنا بنختار النص الأول ونقول مين اللي ممكن يعمله أو ينفع له، لكن للأسف اللي بيحصل في مصر العكس، النجم بيجي الأول وبيشوف النص اللي يليق عليه، يعني النجم هو اللي بيختار الكاتب.
هل يمكن للكاتب أن يتدخل في اختيارات المخرج أو شركة الإنتاج لأبطال العمل؟
- مش النجم الأول، ممكن الكاتب يكون له رأي في نجوم الصف الثاني إنما النجم اللي هيتباع باسمه العمل لا، وده بيحصل في كل شركات الإنتاج.
ما هي أصعب مراحل التحضير للعمل الفني؟
- أصعب مراحل التحضير هي المراحل الأولى للكتابة؛ لأنها الأساس الذي يُبنى عليه العمل بأكمله، وبتكون الصعوبة في كتابة أول خمسة حلقات؛ لأن دول اللي بيتبني عليهم باقي الأحداث، وبيحمسوا المشاهد أنه يكمل العمل.
هل كتبت لفنان مخصوص؟
- كتبت لــ تيم حسن، مسلسل الصقر شاهين، وكان مخصوص له، وكانت التجربة بالنسبالي ممتعة جدًا مع تيم؛ لأنه فنان بجد وعلى المستوى الإنساني كان أكثر من رائع.
مين من النجوم لهم تدخلات أثناء الكتابة؟
- أحب أشيد بــ رانيا يوسف، إنها مبتدخلش في الورق خالص ولا بتطلب أي زيادة أو مساحة في دورها خالص، ورانيا حقيقى كانت من الناس اللي مريحة جدًا في التعامل، كانت تجربة مختلفة عكس أسماء تانية، وإحنا بنحضر كانوا بيطلبوا تعديلات غير طبيعية وساعات كانت ممكن تبوظ النص.
هل طلب منك إحدى النجوم زيادة ما في عدد مشاهده، أو تكبير في مساحة دوره؟
- أه طبعًا كان فيه كتير، معظم الناس البطولة الثانية بيطلبوا زيادة في مساحة دورهم، ونجوم الصف الأول بردو ليهم طلبات، بعضهم بيبقى طلباته بتخدم النص والبعض طلباته بتضر الورق.
هل المخرج أو شركة الإنتاج لهما الحق في رفض طلب النجم لزيادة مساحة دوره أو تأيده؟
- على حسب شخصية المخرج، في بعض المخرجين بيبقي ليهم رؤية صائبة ووجهة نظر، وفي مخرجين بيبقوا تحت أمر النجم، وشركة الإنتاج ليس لها دخل في النص غير لو حاجة خاصة بالعملية الإنتاجية إنما الدراما لا.
مخرج او فنان تتمنى العمل معه؟
- أتمنى أشتغل مع نجوم كتير، على المستوى الشخصي بحب جدًا أمير كرارة نفسي يجمعني به عمل وهند صبري ومنى زكي، وبحب جدًا تمثيل طارق لطفي وبحب أوي يوسف الشريف، دول أحب أتعامل معاهم وطبعًا في مخرجين كتير متميزين وأتمنى أشتغل معاهم زي تامر محسن وأحمد عبد الحميد وطبعًا يسعدني إني أشتغل مع بيتر ميمي؛ لأنه متميز وأحب جدًا تجمعني تجربة
صدر لك مؤخرًا رواية باسم سيد العروش، تعتبر نفسك أكثر روائي أم سيناريست؟
- أنا بعتبر نفسي سيناريست لأني بحب الدراما وبعتبر نفسي إن أنا درامي أكتر من روائي، رغم أن رواية موسي ورواية سيد العروش نالوا إعجاب وإشادة من الجميع، لكني بميل أكتر للدراما.
أيهما أصعب للكاتب من وجهة نظرك الدراما أم الأدب من حيث نمط الكتابة وعنصر الوقت؟
- الاتنين صعب، لكن ده لون وده لون، والاتنين على نفس مستوى الصعوبة، لكن الرواية بتاخد وقت أكبر،؛ لأن العمل الدرامي مهما كان محدد بمدة زمنية معينة.
هل من الممكن أن تحوّل إحدى رواياتك إلى عمل فني؟
- طبعًا ممكن، بس رواية موسي وسيد العروش طبيعتهم في التاريخ الفرعوني فـالتكلفة الإنتاجية هتكون ضخمة جدًا وبتتطلب إكسسوارات وحقبة تاريخية معينة، فــ الموضوع هيبقى مكلف ولكنهم يصلحوا بامتياز إنهم يكونوا أعمال درامية.
كيف تستدعي شخصيات قصتك؟
- بعد أول خمسة حلقات الشخصية بتبقى لحم ودم و بقدر أكمل تفاصيلها من خلال الأحداث زي البيبي اللي بيكبر يوم بعد يوم.
ولكن في بعض الأعمال الدرامية بنشوف أن الشخصية أختلفت تمامًا أو ملامحها تغيرت؟
- ده بيحصل للأسف، لأن في بعض الناس بتدخل متأخر أوي بعدد حلقات قليل وبيصوروا على الهوا من غير ما يكون في أي مراجعة وحلقة بحلقة، إنما لما بيكون النص مكتوب كامل أو على الأقل مكتوب عشرين حلقة منه ده بيخلي فريق العمل كله عنده وقت إنه يقرأ وإن هو يستحضر الشخصية ويشوف تفاصيلها.
أين أنت من السينما الآن؟
- حاليًا بحضر مشروع سينما، هو اتكتب بالفعل ومترشح لأبطال، وقريب أوي إن شاء الله هيكون في أخبار عنه، وأنا فعلًا كنت مركز مع الدراما التلفزيونية الفترة اللي فاتت، إنما السينما طبعًا هي التاريخ وحلم بالنسبة لأي كاتب.
أقرب أعمالك الأدبية الى قلبك؟
- رواية سيد العروش لأنها بتتكلم عن الفرعون العظيم تحتمس الثالث والمعركة الشهيرة مكدو، بالنسبالي تعتبر ملحمة كبيرة وإحنا منعرفش عنها حاجه، وتحضيرها أخد مني أكتر من سنه لأن فيها معلومات تاريخية كتير والمعلومات التاريخية شحيحة .
هل ممكن أن تتجه إلى كتابة المسرح؟
- أتمنى أن أكتب للمسرح، ولكن المسرح محتاج روح تانية ونفس تاني، وأنا مجربتوش بس أتمنى أخوض التجربة دي.
كل كاتب ينشر جزء من تفاصيل شخصياته، أين نجدك في أبطالك؟
- مفيش بالنسبالي أبطال ممكن تمثلني على المستوى الشخصي، مبحبش إني أتناول حياتي الشخصية في أي عمل إلا لو كانت أرائى فقط اللي ممكن أقولها على لسان الأبطال.
هذا يعني أن هناك إحدى الأبطال حمل أرائك تلك للمشاهد؟
- صحيح وكانت في شخصية شاهين في مسلسل الصقر شاهين، حسيت إني محتاج أعمل ماسج أقوله للناس من خلال الشخصية دي.
ما رأيك في انتشار فكرة ورش الكتابة؟
- أنا مش ميال لفكرة الورش لأنه بيبقى في اختلاف في الدماغ، ولما بيبقى كذا كاتب مع بعض شايف أنها مش بتساعد العمل، بالعكس هنلاقي معظم الأعمال الناجحة مش ورش وكتابة فردية.
ماذا عن العمل القادم؟
- في فيلم سينما وعمل درامي لـ رمضان إن شاء الله، لسه مستقرناش على الأسم لكن أقدر أقول إنه عمل باللهجة الإسكندرانية.
نصيحة توجهها للكتاب الجدد؟
- دايمًا صدق نفسك واكتب كتير ومصيرك هتوصل، الطريق مش سهل بالعكس الطريق صعب جدًا، كل كتاباتك دي فلوس متشالة، نوع في أفكارك ونوع في أعمالك، حاول يبقى عندك بطولة نسائية وبطولة جماعية، وبطولة رجولية أكتب رعب ورومانسي واجتماعي خلي عندك أمل في بكرة ويقين إنك هتوصل.
لمزيد من أخبار الفن..أضغط هنا