سماح أنور تعلن عدم شربها الماء منذ 17 عامًا.. السبب مفاجأة

 حلت الفنانة سماح أنور ضيفة مساء أمس الجمعة ببرنامج "كلام الناس" المُذاع على فضائية ام بي سي مصر مع الإعلامية الشابة ياسمين عز، وكشفت الممثلة الموهوبة خلال الحلقة عن  أسرار من حياتها تكاد تكون صادمة للكثيرين، ولعل أبرزها تصريحها بعدم شربها للماء منذ 17 عامًا.

اقرأ أيضًا.. سماح أنور سعيدة بوصفها بالمسترجلة (فيديو)

وكشفت سماح أنور أنها امتنعت عن شرب المياه منذ 17 عاماً بسبب احتوائها على لون ورائحة، ولأنها تضر بصحتها، كما أكدت أنها تقوم بتعويض نقص الماء في تناول الفاكهة والخضراوات وشرب المياه الغازية بدون سكر، أو تناول مشروبات ساخنة بشرط أن تقوم بغلي المياه للتخلص من أي ميكروبات.

وقالت: "لازم المياه ميبقاش لها طعم ولا ريحة، دي مواصفات المياه اللي تتشرب وتنفع، المياه كلها ليها طعم وريحة، دي مبشربهاش، لما باخد شوية منها جسمي بيتضايق علطول، بلاقي بطني وجعتني، وأنا لما ألاقي جسمي أضايق، بعرف أنا أخدت إيه دلوقتي، عشان في حاجات مينفعش معايا وخلاص، أنا لازم أعرفها، عشان أنا اللي بضايق، وأنا اللي بتعب".

وأضافت: "مش لازم نشرب المياه في بوقنا، ممكن نأكل المياه، أنا بأكل المياه كتير، من فواكه وخضروات، لإن هي دي المياه اللي محتاجها الجسم، لو وقفنا في الهوا، الجسم بيشرب الرطوبة اللي في الهوا، ده حقيقي، كل مسامنا بتشرب طول الوقت، البيزنس الأمريكاني بيقولك اشرب مياه طول الوقت، وكل اللي شرب مياه طول الوقت تعبوا، لإن ده مش طبيعي، الطبيعي أن جسمي عايز حاجة هديهاله، لكن ما أجبرش جسمي على حاجة هيرقدني على طول، أو على المدى الطويل".

وأردفت: "المياه المعدنية لها طعم ولون وشوائب، أنا لما بشرب مياه بتعب، أشرب مياه مغلية أو فيها عصير أو قهوة، أنا كده بشرب مياه، فيه دكاترة هيختلفوا معايا وأنا موافقة عليهم أكتر

من كلامي، لإن أنا بتكلم عن النظام بتاعي أنا بس، أنا مش متخصصة، مش بقول متشربوش مياه، أبقى مجنونة، أنا بقالي 17 سنة مشربتش مياه خالص".

سبب ابتعاد سماح أنور عن الزواج

وكشفت سماح أنور عن سبب عدم زواجها حتى الآن قائلة :" أنا مستمتعة لوحدي وأنا في سن مش بتاع حب، وبعدين لسه هقوم أحط ميكب وألبس وأنزل ونسهر ونرجع طب وشغلي وبكون عايزة أنام؟ وأنا من الناس الكسولة واتعودت على البيت ومش بحب أخرج إلا إذا كان عندي شغل".

وتابعت:" اتعودت أبقى لوحدي وبقى دا نظام حياتي ودي جنتي والحياة المثالية ليا، ومفيش راجل فيها ومش بدور على الحب؛ لأنه عايز تفكير ولو حبيت هفكر هل بعد مرور 5 سنين هندم؟ هل هكون مبسوطة على المدى البعيد؟ والحياة العاطفية مش أولوية طول عمري لأني بقع في الحب وبتكون زي الحادثة".

واستكملت قائلة: "عمري ما قولت عايزة أتجوز وبدور على حد، وممكن تحصل بدون ترتيب، وحبيت مرة واحدة في حياتي ومكنتش لطيفة والست لما بتحب بتقع على وشها ودا بيطفش الرجالة، وأنا مش بعرف أتقل وأتحكم وبقعد باصه للتليفون مستنياه يتصل بيا.. وبالتالي اقتنعت إني لا أصلح للعلاقات العاطفية".