الشاعر بهاء الدين محمد يحذر شيرين: اسكتى ولا تتكلمى فوق مسرح أو لقاء

أثارت تصريحات الفنانة شيرين عبد الوهاب الجدل خلال الساعات الماضية وخاصة عندما ذكرت اسم الفنان الراحل حسن أبو السعود بطريقة اشعلت غضب أسرته ومحبيه ، ليعلق الشاعر بهاء الدين محمد عبر صفحته على موقع التواصل الاجتماعي فيسبوك ردًا على تلك التصريحات.

 

(أقرأ أيضًا) عائلة حسن أبوالسعود تفتح النار على شيرين عبدالوهاب

 

 

وقال بهاء الدين: "حسن أبو السعود، حبيبي اللى عمرى ما حسيت إنه مش في الدنيا، واللى كل الوسط بيحبه وكان وجوده فى أى مكان بيعمل حالة من البهجة، بروحه الطيبة وقلبه اللى كله حب وفن".

 

وأضاف: "الفنان اللى عملنا مع بعض نجاحات عايشه لحد النهاردة، ومنها أسف حبيبتي، لما النسيم، في ناس، أصعب حب، وعدى الليل، عمال يحكيلي عنها، ومئات الأغانى اللى كان بخبرته في اللايف بيعرف يجيب الجملة اللى الناس تحبها، وبالفعل سيطرنا سنين على الساحة الغنائية وغيرنا كتير، ده غير أنه كان من أفضل العازفين على الأكورديون في العالم".

 

وتابع : "وفي يوم من الأيام وهو نايم تعبان لقيته إبتسم لي، وسألنى أنت عارف مين أكتر حد ح يزعل عليا لما أموت ؟ قلت له إسم من أسماء ولاده، قالى لأ أنت أكتر حد ح يزعل عليا، وبالفعل أنا مابقيتش حتى أمشى من شارع بيته، وفضلت فترة طويلة أنسى أنه مات لأنه عشرة فن وحياة، وكان بيحبنى كأنى ابنه وكان بيفرح لي بكل نجاح، حتى لو مش معاه وح أبقى احكيلكم إزاى إتقابلنا لأن الموضوع ده مهم".

 

 

وأردف: "المهم علشان أقول اللى ضميرى بيحسه في موضوع شيرين عبدالوهاب، واللي جهات كتير عايزني اقول، رأي في كلامها عنه أو وصفها ، أنا بكل صراحة بقول محستش إنها قاصده

تهينه ولا تسخر منه، هي بس استدعت سيرته بشكل يبدو ساخر، لكن أنا رغم إنى متضايق منها، وهو عندي من أغلى الناس، إلا إن إحساسي قالي انها ماتقصدش".

 

وواصل: "لأن فعلا لما كنا بنتقابل كان بيحتفل بشيرين وبيحب فنها، والبساطة اللى فيها وهى كانت بتحبه وتحترمه، وللعلم أنا لما كنت اروح له وشبعان ومش طايق أشوف أكل أول ما يقولى تاكل بأداء مشوفتش زيه بلاقى نفسي أجوع، الله يرحمه كان فنان ودمه خفيف و قلبه قلب طفل".

 

واختتم: "بس هى غلطانة إنها بتطلع تتكلم، ولو ليا سلطة عليها مش هخليها تنطق لا على مسرح ولا لقاء ولا حتى في حياتها الشخصية، اسكتى يا شيرين".

 

 

وكاننت قد قالت شيرين عبدالوهاب في تصريحاتها في برنامج "كلمة أخيرة" الذي تقدمه الإعلامية لميس الحديدي: "والد حسام حبيب قال عني إنني أدمنت الأدوية، وإن كان هذا لم يحدث وطبيبي موجود، لو كنت أدمنتها أو زاد وزني، فدا من عيشته وحياتي معه، أنا كنت زي البدر ولما عاشرته بقيت شبه حسن أبوالسعود"، وهو ما أثار غضب جمهورها ومحبين الموسيقار الراحل حسن أبوالسعود.