ماذا حدث لرحمة حسن بعد عضة الكلب (تفاصيل)

 كشفت الفنانة رحمة حسن عن معاناتها بعد تعرضها لـ عضة كلب بجوار منزلها، ونشرت ثلاثة منشورات متتالية عبر حسابها الشخصي بموقع تبادل الصور والفيديوهات انستجرام، لتشارك متابعيها أحدث التطورات.

 

(اقرأ أيضًا) رحمة حسن تتهم منتجاً شهيراً بالنصب في هذا المبلغ: 3 سنين يقولي معييش فلوس |تفاصيل 

وكتبت في أول منشور لها خاص ب " عضة الكلب " وما حدث لها بالتفاصيل قائلة: " مساء الخير.. امبارح الساعه ١١ بليل كنت نازله اجيب حاجه من السوبر ماركت جمب البيت، وكنت ماشيه علي الرصيف وكان في عربيه بتركن جمبي عادي ، فجاه الباب اتفتح ولقيت كلب (جيرمن شيبرد) تقريبا مَش متأكدة أوي، بيهجم عليه بكل قوته، طبعًا حاولت أجري لكن للأسف الكلب كان قوي وشرس ووقعني على الأرض، حاولت أقوم وأجري وصاحبته حاولت تشده، بس فك الليش بتاعه وعضني عضه كبيره وغويطه بنابه في منطقة حساسة".

 

 

وتابعت حديثها: " صاحبة الكلب كتر خيرها اخذتني فورًا علي مستشفي إمبابه ، ادوني حقنه تطعيم الكلب ولسه فاضلي ٤ هاخدهم خلال شهر، بس المشكله إن من إمبارح الجرح بينزف دم كتير، وأنا طبعًا خايفة ومصدومة وتعبانه وعندي تروما من امبارح، والي واجعني أكتر اني مَش عارفه اتصرف ازاي.. خصوصًا اني اكيد مَش عايزه الكلب يتاذي، بس كمان مَش عايزه اي انسان كمان يتاذي ويتعض ويتبهدل في الشارع زيي ".

 

وكتبت: " أنا كنت بشوف الكلب ده دائمًا مع صاحبته بتمشي بيه في الشارع جمب البيت عندي، وعشان شكله شرس كنت بامشي بعيد عنه لما بشوفه، امبارح صاحبت الكلب قالتلي متخافيش هو عض ولادي قبل كدا وتمام محصلش حاجه ! طبعا أنا اتصدمت لما عرفت أنها مَش أول مرة الكلب يعض حد ومع ذلك هي سايباه عادي في الشارع منغير كمامه او حد قوي يمسكه .. بجد حرام عليكم، الكلب لما بيكون حجمه كبير وشرس بيعتبر سلاح ، وصاحبه مسؤل مسؤليه كامله عنه ويحاسب علي اهمال مسؤليته ، خصوصا لو اهماله تسبب لشخص تاني في اذي بدني يحتاج اكتر من ٢١ يوم علاج واذي نفسي ماعرفش

هايحتاج قد ايه عشان يخف ".

 

 

وتابعت حديثها: " انا كنت بحب انزل احط اكل ومايه للكلاب والقطط تحت البيت ، دلوقتي انا حقيقي مرعوبه اقرب منهم وخايفه جدًا.. أنا أسفة طولت عليكم بس أنا بجد مَش عارفه المفروض أعمل ايه عشان محدش تاني يتأذي ".

 

وفي منشور آخر كتبت: " مساء الخير..أنا متشكره جدًا لاهتمامكم ولكل الناس الي كلمتني تطمن عليه، وأسفة إني ماقدرتش أرد على معظم الناس لأني كنت تعبانة ومش قادرة اتكلم، أنا رحت المستشفى النهاردة وكشفت عند جراح متخصص وهو غير علي الجرح وعمل الازم والحمد لله طمني، وقالي أتابع معاه الفتره الجايه وإني هاكون كويسه إن شاء الله والجرح هاياخد وقته وهايخف" .

 

 

وتابعت حديثها: " وبالنسبة للكلب فإحنا اتكلمنا مع صاحبته وطلبنا منها توديه مركز تأهيل وتدريب علشان تعدل سلوكه، وتبعت لنا الورق الرسمي الي بيثبت أنها ودت الكلب فعلا، وإلا هاعمل محضر .. وساعتها الكلب الي هايتضر ، ودي حاجه ماترضيش حد . وهي كانت متفاهمه جدا و وافقت وقالت أنها هاتعمل كدا أول الشهر الجاي، علشان أخوها الي هايوديه ويتولي مسئوليته.. الحمد لله أنا كويسة والكلب كويس.. وأتمنى أن صاحبة الكلب تصدق في كلمتها وتودي الكلب فعلا مركز تعليم ويبقي كويس".

 

وفي منشورها الأخير نشرت صورة لتطعيمات الكلب لتطمئن متابعيها فكتبت: "دي صور لتطعيمات الكلب الحمدلله طلع مش مسعور ".