خالد عليش: أخدت حكم تاريخي النهاردة وحسبي الله ونعم الوكيل في كل اللي ظلمني

كشف الفنان خالد عليش، عن تطورات جديدة خاصة بقضية ابنته، مؤكدا حصوله على حكم قضائي منصف، وذالك عبر حسابه الشخصي بموقع التواصل الاجتماعي فيسبوك.

 

اقرأ أيضا .. تامر عاشور ورامى صبرى لإحياء حفل واحد بموسم جدة (تفاصيل )

 

وقضت محكمة الأسرة بمدينة 6 أكتوبر، اليوم، بتمكين الإعلامي خالد عليش، من رؤية صغيرته لمدة 11 ساعة أسبوعيًا يوم الجمعة، وإلزام مطلقته بالتنفيذ.

 

وترجع وقائع الدعوى إلى أنه بعد انفصال الإعلامى عن طليقته، أراد حل الأمور بطريقة ودية فحرر عقد اتفاق مع طليقته وأسرته، قرر فيه إلتزامه بكافة نفقات ومصاريف الطفلة الصغيرة، مقابل السماح له برؤية ابنته بطريقة آدمية، وبعيدًا عن مراكز الرؤية.

 

وتابعت الدعوى أنه رغم التزام الإعلامى خالد عليش بتنفيذ ما تم الاتفاق عليه خلال العقد، إلا أنه فوجئ بمطلقته ترفض تنفيذ بنود العقد، وأرادت أن تكون الرؤية في مركز شباب، وهو ما يضر به وبطفلته الصغيرة، ما جعله يلجأ لمحكمة الأسرة.

 

وتم تداول الدعوى أمام محكمة الأسرة بمدينة 6 أكتوبر، حيث حضر الإعلامي خالد عليش في جلسة الحكم، وتحدث عن معاناته وحرمانه من رؤية نجلته الصغيرة.

 

 

وكتب خالد عليش في منشور له: “النهاردة أنا خدت حكم تاريخي يارب يتنفذ على خير، وتاريخي لأنه أحسن حكم ممكن آخده في ظل ظروف قانون الأسرة السيئ لحين تعديله، واللي طلع الحكم قاضي مش واحد صاحبنا.. ف ده معناه إن الراجل قرأ وفهم وبيدي لكل واحد حقه”.

 
وتابع: "لكن جه الوقت اللي أقول فيه اللي جوايا .. حسبي الله ونعم الوكيل، أنا خصيم لكل واحد أو واحدة حتى يوم الحساب ساعدوا بشكل مباشر أو غير مباشر إني ما اشوفش بنتي بطريقة إنسانية
كل حد كبير أو صغير جريت وراه بالمكالمات عشان أشوف أي حلول ودية".

وأكمل: “حتى الحركات والجروبات النسوية اللي بيدافعوا عن الست وخلاص، أي حد بيكتب تعليق وهو مش فاهم حاجة، فاض بيا الكيل والعمر بيعدي واستحملت الكثير من الاتهامات الباطلة وعلاقتي ببنتي بتبوظ يوم بعد يوم”. 

وأضاف: “أنا ملتزم بكافة الالتزامات المادية ناحيتها من اول يوم كاملة و زيادة كمان عن المستوي المادي و الاجتماعي اللي عايشين فيه و مع ذلك استحملت كتير و ماردتش، انا لا حول لي ولا قوة حاولت مع كل الحلول الرسمية و الغير الرسمية، تعبت من اللف في دوائر مغلقة”. 

وعقب: “تعبت من نظرة والدي و والدتي المريضة اللي نفسهم يشوفو حفيدتهم و مش قادر اعملهم ده، انا اوحش رجل في العالم و لكن ما استحقش اني ما يكونش عندي فرصة اتكلم و اخرج معاها و افسحها عشان علاقتي بيها تبقي كويسة، محدش يقولي انت السبب عشان سيبت ماماتها، انا و والدتها كان في بينا عشرة طيبة و ايام كتير حلوة ولكن لم يحالفنا التوفيق في النهاية و كل شئ نصيب و الانفصال كان برغبتها قبل رغبتي”.

واشار: "محدش يقولي ما انتا كنت زوج وحش و .. و .. انا يمكن مكنتش احسن زوج برغم اني عملت اللي عليا كتير و اجتهدت كتير عشان اسعد الطرف التاني ولكن ده مش معناه اني انسان وحش و مستحقش فرصة تانية ومستحقش اشوف بنتي، محدش يقولي ما انتا مبسوط و اتجوزت تاني، انا فعلا الحمدلله زي الفل و مبسوط اني اخدت فرصة تانية ربنا يكرمني فيها و اكون انسان افضل و استمتعت ب حق  ربنا سبحانه و تعالي و المجتمع اداهوني اني اتجوز تاني بعد انفصالي رسميا باكتر من سنة بس مش معنى كده اني ارمي طفلي مع امه و مطلوب مني انساه
محدش يقولي ما انتا كنت بتشوفها". 

وتابع خالد عليش كاتبًا: “انا فعلا مع بداية الانفصال كنت بشوفها ساعات قليلة في الاسبوع  بس مع اي تصرف ما يعجبش ماماتها تقولي اصل البنت مش فاضية عندها عيد ميلاد عندها تمرين و وسط شروط كتير منها متتصورش معاها و تنزل ليها صور - متوديهاش عند اهلك - تيجي عيد الميلاد لوحدك بدون باباك

او ماماتك، حسيت في الوقت ده اني لازم استخدم التعاقد اللي بيني و بينها اللي بيقول اني اخد البنت يوم في الاسبوع و لكن القانون اداني حق الرؤية الطبيعي الغير انساني لطفل”.

واوضح: “فضلت ٥ شهور في مساومات اني معملش تنفيذ لحكم الرؤية حفاظا علي البنت و لكن ماماتها صممت و بعد التنفيذ كان مهانة و مذلة للطفلة و ليا بعدها مبقتش اروح و بعت انذار رسمي ليها بكده و مازلت في الاجرأت القانونية الجديدة بعد فشل المحاولات الودية اللي الحمدلله النهاردة خدت فيها حكم منطقي و مناسب”. 

وكتب: "محدش يقولي ما انتا ما بتصرفش عليها و مبهدل ماماتها في المحاكم، برغم ان مش ده الموضوع بس الحمدلله الفلوس اللي الام طلبتها كنفقة و مصاريف بتوصل كل اول شهر بدون اي محاكم من اول يوم حصل بينا انفصال رسمي بدون محكمة بعقد اتفاق بينا و لو حصل دخول محاكم في اول الخلاف ف الام اللي بدأته وده بالتواريخ مش بالكلام
موضوع ان في مصاريف زيادة بتطلب بشكل مبالغ فيه دي قصة تانية فيها نقاش و حوارات كتير و مع ذلك قولت انا عندي استعداد لأي زيادة غير منطقية بس نقعد و نتناقش". 

وانهي كاتبًا: "محدش يقولي روح شوفها عند جدتها عشان انا مش هاعرف يبقي في علاقة طيبة بيني و بين بنتي و انا قاعد معاها ساعة عند جدتها و هما قاعدين جنبي و قعدتي تبقى كلها مذلة و مهانة.

محدش يقولي انتا بتتظاهر انك عايز تشوف بنتك لكن انت مش فارق معاك، الابهات هنا اللي هيحسو قد ايه دي حاجة مؤلمة و انا مش محتاج اعمل ده و طول الوقت طلبت من اي حد قريب منهم ان احنا ننزل و نقعد و نوصل لحل وسط انا مش طالب فيه غير اني اخد بنتي يوم في الاسبوع اخرجها و ارجعها "انا نفسي احس بحضن بنتي بقالي اكتر من سنة و مقعدش اتكلم في مشاكل حصلت من سنين انا اوحش رجل في العالم بس حقي اخد فرصة عشان تكون في علاقة كويسة بيني و بين بنتي حسبي الله و نعم الوكيل". 

 

ونشر خالد عليش صورة له مع ابنته عبر حسابه الرسمي علي موقع التواصل الاجتماعي انستجرام.

وعلق خالد عليش علي الصورة قائلا :" ربنا عالم انا قد ايه محتاج حضنك في اوقات كتير…ربنا يهدي الأمور و يجمعنا علي خير "

قبل أشهر قليلة، عادت أزمة الفنان خالد عليش وطليقته ميما الشامي للظهور مرة اخرى بعد ان قام عليش بنشر بوست عبر حسابه يهاجم طليقته التي قامت بالرد عليه .