رئيس حزب الوفد

بهاء الدين أبو شقة

رئيس مجلس الإدارة

د.هانى سري الدين

رئيس التحرير

د.وجدي زين الدين

في "استاد" مصر.. "اللعب" مع الكبار!

محمد فاروق عجم

الثلاثاء, 10 يوليو 2012 14:59
بقلم: محمد فاروق عجم

أعزائي المتفرجين..
الجماهير المصرية في كل مكان..
أهلا وسهلا بكم في الوصف التفصيلي لمباراة كرة القدم المصرية..
في مقاعد الجماهير في "استاد مصر".. حوالي 85 مليون متفرج..
الجميع الآن في أرض الملعب..
يحكم مباراة اليوم "الحكم" محمد مرسي..

طبعا كلنا عشنا الجدل قبل المباراة عن الطاقم الذي سيتولى إدارتها إلى أن تم الكشف عن هويته..
وشايف مبادرة كويسة "الحكم" بيسلم على كل اللاعيبة..
و"بيحلف يمين" إنه يدير المباراة

باقتدار وإخلاص
...


وأدي صفارة البداية..
اللعب ابتدا .. هات وخد ..
كله بينفذ خطته للفوز..
سخن قوي اللعب..
هوباااا .. جووووول..
ناس بتصقف وفرحانة.. وناس تانية زعلانة..
وناس بتسأل: هو الجول صحيح؟ مش أوفسايد؟..
لكن فيه خناقة بين اللاعيبة يا جماعة..
كله بيضرب في كله..
شايف لاعيبه معترضة عايزه "إنذار" ولاعيبة تستحق "الطرد"..
وآدي "الكاميرات" رايحة جاية على الجميع..
...


طيب نشوف بسرعة الأستديو التحليلي رأيه إيه..
ـ كابتن فلان: الهدف صحيح طبعا
ـ كابتن علان: لا.. لا.. الهدف غير صحيح
...


نرجع للمباراة..
ونقول للي كان بيشرب كوباية شاي أو خرج البلكونة..
إن اللعب مستمر..
لكن فيه عنف واتهامات متبادلة..
شكلها كده فيه شوط تالت ورابع..
ولا فيها "ضربات" جزاء؟!!
مش ممكن يا جماعة الماتش فوق صفيح ساخن..
المباراة أقرب لـ"الميلودراما" واللعب فوق مستوى قدرات الجماهير..
...

أوباا.. "المونيتور" قطع عندي..
طيب لحد ما يرجع.. نقدر نقول:
في الملعب اللعب بين الكبار..
ومحدش من الجماهير فاهم حاجة..
واحد يقولي فيه حسابات فيه اتفاقات..
أقولك النتيجة خارج التوقعات!!