سامحني يا حسيني ويا شيخ عماد .. زجل سياسي عن الدستور
سامحني يا حسيني ويا جيكا ويا شيخ عماد كنت بجيب قوت الولاد فعشموني بالاستقرار.. أصلهم قالولي لو ما أختارتش نعم هتبقى من الكفار!! والحشد كان ليل نهار من كل الأعمار
معرفش مين معايا ومين ضدي النهاردة اللي معايا بكره ندي وسياسة ملعونة بتلعب بالشعب القمار
سامحوني لأني فاجأه!! في ليلة من الليالي لقيت دستوري ودستور عيالي أتعمل وقالولي مفيش خيار
دستور بيلف يدور على صاحب المستور وهو نفسه الدستور اللي كان في حياتنا محشور قبل ما الكبت يثور وقبل ما الحرامية تغور وبرده شخص واحد هو صاحب القرار
صدقني يا صحبي مش عارف!!! مش شايف صدقني أنا خايف!!!! هل "نعم" بتدخل الجنة.. ولا "لأ " هي اللي هتخلي بلدنا جنة ولا الأتنين عكس ما بنتمنى ولأمتى راح نستنى لبلدنا العمار
سامحوني أصلهم عموني وعلى الكذب عودوني وفي فكري قيدوني وفي حلمي دبحوني وفي شرفي خونوني وفي ديني
طيب ليه كل دا....!!! أنا لا مع العدا ولا بفهم في دا ودا أنا بس عايز قوت عيالي أنا اللي جيبي خالي أنا اللي بيتي صفيح في العلالي بحلم يبقالي بيت ودار
يا اللي بتهللوا ... "نعم" و "لا" مش هما المعيار على النصر و الازدهار دي المعلمة في القرار اللي يحفظ كرامتي وما يقولش لصاحب حق... موت يا حمار!!!!
حقكم ودمكم في رقابهم كلهم وحياة ولادنا اللي زيكم لنكشف المستور ونطلع الأسرار
____________________
الإمضاء .. مواطن مصري بسيط من وسط الشارع والغيط