بسمة.. تطالب بإنقاذ بنات البلد من كابوس العنوسة

ع الـهـامـش

الاثنين, 21 مايو 2012 17:00
بسمة..  تطالب بإنقاذ بنات البلد من كابوس العنوسة
فكرية أحمد

كانت تسير متأنقة في شعبية كبنات وسط «البلد»، نحيلة.. رقيقة كعود من الأبنوس الصلب وقد تلون بسمرة الشمس، في عينيها لمعة وبريق فرحة استوقفني، وكأنها ذاهبة لحفل

ما أو عرس، وحين حاورتها، اكتشفت أنها هي العروس، وأنها في طريقها لشراء لوزام عرسها الذي أعدت له ليكون مع انطلاق أول انتخابات رئاسية في مصر، وقالت في بساطة: «حتي تكون الفرحة فرحتين» وكان الحوار.
- بسمة جميل أحمد، 19 سنة، رايحة اشتري شوية حاجات عشان فرحي عقبال ولادك.
- أنا أصلاً من المنيا وعايشة هنا مع أهلي، وعريسي معاه دبلوم متوسط و«فران» عنده 21 سنة، ومن الصعيد برضه، أصل الصعايدة بيحبوا يجوزوا ولادهم بدري عشان الستر حلو وبيحمي الشباب.
- إحنا اتفقنا نخلي فرحنا مع الانتخابات، عشان تبقي الفرحة فرحتين، ماتنسيش إنها أول مرة ننتخب فيها رئيسنا، ودي حاجة كبيرة قوي والناس بره بتراقبنا وبتتفرج علينا هنعمل إيه؟.
- أنا هعمل فرحي هنا في مصر «تقصد القاهرة» وهاعيش مع عريسي في بلده ببني سويف.
- الواحدة بلدها بلد جوزها وتروح معاه أي مكان، ما هي كلها أرض مصر، صحيح هفارق أمي وإخواتي بس هي الدنيا كده.
- لا والله ماتقلناش علي العريس في الطلبات لا في الشبكة ولا الجهاز، العروسة برضه لازم تساعد، والدنيا بقت غالية وصعبة، وإن ماكانتش البنات تتنازل شوية عن مطالبها الدنيا هتتعقد ومش هيبقي فيه جواز.
- قبل الثورة كان برضه نسبة العنوسة عالية، وزادت شوية من بعد الثورة، عشان الشقق غليت أكتر والعفش بقي نار، والدهب أسعاره فوق الخيال، والشباب مش لاقي شغل، يبقي الشباب ده هيتجوز إزاي؟
- أنا نفسي الريس الجديد يعمل مشروعات شقق للشباب في المناطق الجديدة  شقق صغيرة وبسيطة كده، يأجرها للشباب مش يبيعهالهم، يعني مثلاً المحافظة تبني هي الشقق دي ويساعد في البناء مستثمرون مصريون من الناس اللي بتحب البلد، وبدل ما يبيعوا الشقق للشباب اللي مش

لاقي يدفع، يأجروها، والشباب يدفع الإيجار للمحافظة أو لشركة السكن اللي ممكن تشرف علي الشقق دي عن طريق المحافظة، وبكده يسهلوا علي الشباب، لأن حكاية بيع الشقق برضه بقت عملية صعبة وزودت العنوسة، والأهل بقوا خايفين علي ولادهم، ولازم يبقي فيه حل.. حل حقيقي ينقذ الشباب وبنات البلد ويحميهم من الغلط والعياذ بالله.
- طبعاً قبل الجواز لازم يكون فيه شغل امال الشاب هيفتح بيته منين؟.. بس الشباب دلوقتي بيشتغل أي حاجة، ومش بيتمسك إنه يشتغل بشهادته عشان ظروف البلد، المهم بعد كده يكون له هدف ويقدر يفتح بيت ويعمل أسرة، لأن الشباب أتعقد والبنات «بارت»، والشقة أهم مشكلة بتواجه الشباب وأنا شايفة الحل في شقق بالمناطق الجديدة تبع المحافظة وتكون إيجار.
- أنا عندي أمل خصوصاً إني داخلة حياة جديدة، ومتفاءلة إن بكره إن شاء الله هيكون أحلي، الناس فاقت وصحيت ومش هترضي ترجع زي زمان، بس المهم إن كل واحد يرجع لضميره ويحس إن ربنا مراقبه، وإن الدنيا مهما طالت وادتنا هي برضه قصيرة وهتنتهي، يعني لازم كل واحد يجهز نفسه ليوم الحساب، لو عملنا كده بلدنا هتبقي أجمل بلد في الدنيا.
وقبل أن أغادرها لا أنسي أن أقول لها: «ألف مبروك» وعقبال كل البنات.