بنات وشباب مصر: العيب فى المجتمع مش البنت
احتفالا باليوم العالمي للبنت والذي أقامته منظمة اليونيسيف الخميس الماضي، قامت حملة "علشان انا بنت"، برصد ردود فعل البنات تجاه الاحتفال باليوم العالمي للبنت وما الذي تعاني منه البنت المصرية تحديدا، وجاءت مشاركات البنات لتعبر عن مدى استيائهم من المعاملة والسلوكيات التي تتم ضدهم في المنزل والعمل والشارع كالتالي:
فتقول شيماء كامل: عشان أنا بنت لو عملت اي غلطة صغيرة كانت او كبيرة اهلي يمنعوني من مرواح الجامعة وإذا كمان رفضت اسمع كلامهم في اي حاجة برده اتمنع من الذهاب للجامعة.
بينما شاركت هدى الترهوني برأيها قائلة: عشان أنا بنت اتنادى باسم أخويا او جوزي مش باسمي، عشان انا بنت كل الناس بتغلطني لما اتخانق مع راجل من غير ما يسمعوا الموضوع اصلاً.
سمعة البنت
وعن الانطباعات السيئة المأخوذة عن تصرفات البنات قالت نعمة جمال: البنات المحترمة متحطش الهاند فرى فى ودانها وهى ماشية فى الشارع
البنت المحترمة متخرجش فى العيد مع اصحابها حتى لو بنات بس يتفسحوا
البنت المحترمة متقصش شعرها قصة ملفتة ولا تصبغ لون فاتح زى الممثلات او الاجانب، البنت المحترمة متلبس الالوان الفاقعة والاحمر والفوشيا ممنوع، البنت المحترمة متقفش فى البلكونة، البنت المحترمة مترحش تذاكر عند صاحبتها.. صاحبتك لو عايزة تيجى هيا تذاكر عندك، البنت المحترمة متاكلش وهى ماشية فى الشارع، البنت المحترمة متحطتش رنة موبايلها اغنية ولا صورة اليسا على الديسك توب، البنت المحترمة متطلعش رحلات مع الجامعة، البنت المحترمة متعملش فيس بوك باسمها الحقيقى، البنت المحترمة متلبسش حلق كبير او اكسسوار ملفت ولا مانيكير، للأسف هو ده مقياس البنت المحترمة فى مجتمعنا مع انه ممكن البنت متعملش فعلا ولا حاجة من دول وتكون مش محترمة، وتضيف سهام شعرواي : عشان انا بنت معرفش احط صورتي ع الفيس بوك والا هتقرف من كتر الرسايل اللي هتبعتلي وفاكرين البنت سلعة.
وعن صحوبية البنات تقول نور عادل: عشان أنا بنت يبقي من حق أي واحد مش محترم إنه يطلب يصاحبني ولو عاملته باحتقار يستغرب أوي عملا بمبدأ هو أنت لاقية،عشان أنا بنت بتحب الضحك لازم يتقال عليا من ورايا إني سهلة ومقضياها، وعشان أنا بنت ما ينفعش أخرج مع صحابي الولاد اللي بأثق فيهم عشان الناس هتقول بتصطاد عريس أو مش محترمة، وعشان أنا بنت لازم كل مرة وأنا واقفة لوحدي مستنية أي حد لازم أسمع كلمة هو البقف ماجاش، طب ما تاخديني بداله، وعشان أنا بنت مؤمنة جدا بحقها في الحياة وبحريتها بأعيش حياتي بالطريقة اللي اخترتها ومليش دعوة بحد.
اصطادي عريسك
وعن البنت والعرسان تقول أمنية شلبي: عشان انا بنت لما اروح فرح يبقى بالتأكيد راحه عشان اشوفلى عريس، عشان أنا بنت يبقي لازم أروح كل الأفراح للي اعرفه واللي ماعرفهوش وعلي سنجة عشرة، عشان أنا بنت ببقي في وقت من الأوقات مجرد بضاعة في فاترينة لما واحدة ظريفة تيجي تقولي أنا جايبالك عريس، وتضيف أشواق براهام: عشان انا بنت يشاغلني واحد في البص ويلمسني: عيب عليه بس لازم اسكت الناس تقول عليا ايه وطالبت بحقي، وتؤكد على الكلام مها عزام: عشان انا بنت مينفعش يبقي عندي اي طموح غير اني الائي عريس الغفلة، وتضيف إيمان عمارة : عشان أنا بنت لازم مايكونش ليا اهتمامات غير المكياج والخطوبة ولو ليا اهتمام بالسياسة أو الثقافة يتقال عني إني مسترجلة.
هالة الوزيري: عشان انا بنت لما اروح مكان اخد فيه كورس او تدريب واسأل زميل هناك على حاجة يبقى انا جاية اشوف رزقى .
المتحرشون
اما التحرش فكان له نصيب من تعليقات البنات فتقول ماريا سعد: عشان أنا بنت بنزل من بيتي بالعافية ويتحرشوا بيّ فى الشارع ومابعرفش ارُد عشان لو رديت هبقي قليلة الأدب وفي الآخر لو اشتكيت أول سؤال هيتسأل لي هو أنتي كنتي لابسة إيه؟، عشان انا بنت لما اجى اعمل مشروع تخرجى فى هندسة اتركن على جنب واتعامل معاملة القهوجى اللى بيقدم الطلبات، عشان انا بنت لو عملت لايك لكلام ولد عجبنى يبقى عيزاه يضفنى بس عشان انا بنت، اما ميرا يسري تقول: علشان انا بنت لازم انزل مكشرة استعداد لاى واحد ناوى يضايقنى.
اما عن تقييد الحريات فتقول علا المهدي: عشان انا بنت مينفعش اخرج مع صحباتي نتفسح من غير مانسمع كلام حقير، عشان انا بنت مينفعش اثور او اتناقش واتكلم لاني اكيد مش فاهمة حاجة، عشان انا بنت لازم ارضي كل اللي حوالية ومش مهم انا عايزة ايه، عشان انا بنت لو طالبت بحريتي وقوللت دي حياتي واعيشها زي منا عايزة ابقى قليلة الادب، عشان انا بنت مش هرضي باللي اتفرض عليا، انا انسانة وربنا اداني حقوق وعايزاها كلها ومش مستعدة اساوم عليها، هناء المنصوري: علشان انت بنت لازم تعتزي بنفسك وتدافعي عن
ولكن هناك من البنات من يرى أن العيب هو عيب مجتمع وليس عيب البنت فتقول غادة سامح: علشان أنا بنت بأعلن ان العيب مش فيا لكن في المجتمع اللي حواليا
علشان انا بنت حبيت النهاردة أعبر وأصرخ وأكشف عيوب مجتمعي اللي رفضاها ومش هاقبلها ومش هاعلمها لأولادي، علشان أنا بنت مش هاكون سلبية ولا هاكون عدائية لكن أكيد مش هاسكت، أنا انسان أراد ليَّ الله أن أكون امرأة لأقوم بدوري بجانب الرجل فخورة بكوني امرأة وفخورة بدوري في الحياة
وختمت نهى الراوي تعليقاتها قائلة: علشان أنا بنت لازم أعمل حاجة من الثلاثة: 1- أتجوز أو 2- أموت أو 3- اندفن بالحياة، لأن الحياة من غير راجل انحلال وصياعة من وجهة نظر المجتمع.
رجال متضامنون
الرجال أيضا شاركوا البنات في الاحتفال بيومهم وعبروا عما يعانون منه كونهم ذكورا يحترمون البنت فيقول محمد مصطفى: عشان انتى بنت ليكى منى كل الاحترام والتقدير مهما اتصرفتى، مهما لبستى انا ف حالى.
أما رسمي الخطيب يقول:علشان انتي بنت باقوم من مكاني في الباص علشان انتي تقعدي.
بينما يقول مصطفى مسعد : علشان هى بنت لو حد ضايقها لازم اسكت علشان ميتقليش انت مال اهلك هى كانت اختك ولا قريبتك، برضه علشان هى بنت الرسول صلى الله عليه وسلم وصانا عليها وعلشان كده لازم نحطها جوه عنينا ونجيبلها حقها لان هى الام والاخت والزوجة.
اما عن معاناة شقيق البنت يقول مينا مكرم : علشان اختى بنت لازم اوديها واجبها كل يوم من المدرسة او درس، ريمون ادوارد: علشان اختى بنت مش بقدر اهذر معاها فى المواصلات وبخاف انها تضحك بصوت عالى علشان الناس هتبصلها بطريقة مش كويسة.
وعن المجتمع الذكوري يقدم ميشيل رمسيس شهادته قائلا : علشان انا راجل مصرى متعلم انا معاكوا فى كل اللى انتوا بتقولوه ده، انا شايف ان كل اللى انتو فيه ده سببه ان انتوا عايشين فى مجتمع متخلف مش بيفكر غير فى الاباحية.
ده كفايه ان مصر واخدة المركز التانى فى الدخول على المواقع الاباحيه، احنا فى مجتمع الراجل بيصحى من النوم مش بيفكر غير ازاى انو يرضى شهواته الجنسية بأى طريقة مهما كانت و فى الاخر يقول ان المشكلة فى البنات ولبسهم، احب اقولكم ان انا زعلان عليكم جدا لان انتم اكتر فئة مضطهدة فى البلد، وعلشان كده انا معاكوا فى اى حاجة و يوم ما يكون فى وقفة انا اكيد هاكون معاكوا وهاطالب بحقوقكم معاكوا.
وقدم مراد ميشيل النصائح للبنات بطريقة تهكمية على المجتمع قائلا : علشان انتي بنت تقعدي في البيت اريحلك، علشان انتي بنت متكلميش حد ولا حد يكلمك اريحلك، علشان انتي بنت تلبسي كل هدومك علشان تخبي جسمك اريحلك، علشان انتي بنت نجاحك في تعليمك ولا شغلك مش مهم، علشان انتي بنت لازم تتجوزي وانتي طفلة علشان سترتك.
علشان انت بنت محدش يلوم غيرك لو حد لمسك.