أمر اعتيادي.. شعر
شعر _ أحمد عويس
أيوه بأزعل ..
بس عادى ..
فاكرة لما قولتى "هأفضل ..
عمرى ما هاغيب عن ميعادى"
بعدها كام ليلة عدت
لحد ما بقينا الليلادى
كل ليلة بتبقى أبعد ..
عن خيالى وعن بلادى
واللى كان صعب أنه يحصل
ليه بقى أمر اعتيادى ..
*
كنتِ ليه بتقولى جاية
لما أنا مش شيء ضرورى
لما سهل البُعد عنى
ليه بتنغرسى ف شعورى
سيبى أحلامى وسيبينى
ليه مُصرة تعذبينى
ليه تضنى .. وليه تجورى
وليه أنا أفتكرك ليلاتى
و اللى كان صعب أنه يحصل
يبقى ليه أمر اعتيادى ..
*
انتهى وخلاص خلصنا
أيوة عارف .. بس خايف
خايف أنسى بشكل مُطلَق
لمسة الإيد والشفايف
خلى منك بس ذكرى
حاجة تبقى معايا بكرة
حاجة بيها أبقى عارف
أنه مريتى ف حياتى
يومها ممكن أبقى أقوى
والبعاد يبقى اعتيادى!