الأقوال المستباحة في النقد والصراحة

بخيت بيومي

الثلاثاء, 24 مايو 2011 10:15
بقلم- بخيت بيومي:

 

إلي الرئيس الأمريكي أوباما

شكراً علي المنحة النقدية

ونجاملك في أفراح بناتك والانتخابات

الامريكية، واوعي تكون مسألة الحدود

تمثيلية، وربنا يكفيك شر

 

مؤامرات الصهيونية..!!

< إلي سيادة النائب العام عبد المجيد محمود

يا سيادة المستشار

أقولك باختصار

العدالة البطيئة

بتموّع الحقيقة

وتزود الأشرار

وأخاف يحصل انفجار

< إلي المحامي العبقري الأستاذ فريد الديب

مصر جاتني في المنام

وبعتالك معايا التحية والسلام

وبتقولك يا ابن الناس الكرام

تدافع عن حقوقي المنهوبة

وتاخد مني كام..!!

< إلي الاعلامي الكبير حمدي قنديل

بيقولك عم عباس

سواق الميكروباص

الشارع وكل الناس

في انتظار قلمك الرصاص..!!

< إلي المستشار عاصم الجوهري رئيس جهاز

الكسب غير المشروع

موضوع مدام سوزان

والفيلا اللي ملهاش عنوان

والعفو والخلعان

واللف والدوران

حيرجّع الناس للميدان..!!

< إلي الإعلامية نجلاء الغنام مدير إذاعة الأغاني

رسالة من ودان الناس

ومن وداني

بنقدم التحية

وأجمل الأماني

للحراس المخلصلين

علي كنوز الأغاني

< إلي الكاتب الكبير محمد حسنين هيكل

بصراحة انت تاريخ

وضد أعداء التاريخ

وكلامك صواريخ

بيكشف الحقايق

ويكسر البطيخ..!!

< إلي فريق النادي الأهلي

زي ما قال كابتن شطة..

فريق من غير صانع العاب وخطة..!!

يبقي المدرب أونطة..!!

وممكن يتغلب من الانتاج الحربي وطنطا..!!

< إلي دكتور زكريا عزمي اللي كان رئيس الديوان الجمهوري

بيقولك الحاج عبد الجبار

مش كنا مروحين

وحيخلص المشوار

فرحة ما تمت خدها الغراب وطار

أصل الزمن دوّار..!!

< إلي عبد الله المصري الغلبان مجهول العنوان

المذكور عاليه قدم علي شقة ومستلمش

وقدم علي وظيفة في الحي ومشتغلش

وكان عايز يتجوز ومطلش

ونزل يستحمه في البحر مطلعش..!!

< إلي المهندس أحمد زكي عابدين محافظ كفر الشيخ

عشان سعادتك رافض تشيل

اسم وصور الرئيس المخلوع

بيقولوا في البلد ان كفر الشيخ

تبقي بنت عم شرم الشيخ

امال ايه يعني بقي الموضوع..!!

نرجو الافادة في ظرف أسبوع..!!

< إلي محافظ القاهرة الدكتور عبد القوي خليفة

البياعين في الشوارع فارشين

وقاعدين ومبلطجين

قوللي يا دكتور انت فين..!!

مع تحياتي الشاعر بخيت بيومي