قاهرة المعز بتستغيث..!!
* إلي اللواء عبدالقوي خليفة محافظ القاهرة
يامغيث..
قاهرة المعز بتستغيث..!!
من الزبالة والبلطجية والأباليس..!!
وزحمة الكارو والميكروباص والأتوبيس..!!
* إلي الرئيس السوري بشار الأسد
بيقولك سعيد المجنون
حتدخل التاريخ
من الباب اللي دخل منه نيرون..!!!
* إلي النجم الشاب الكوميدي أحمد حلمي
هنيالك
خلي بالك
الاشارة مفتوحالك
دوس.. فوت.. عدي
في اللي هما مش وش ذلك..!!!
* إلي الكاتب الصحفي الكبير عبدالرحمن فهمي
ياعمدة العمود والمقالة
افتح وكالة
في بلاط صاحبة الجلالة
للاحترام الصحفي
ومحاربة الفساد والندالة..!!!
* إلي المخرجة الجريئة إيناس الدغيدي
حقولك كلمتين
شاغلين بالي
فيلم الصمت اللي انتي
ناوية تعمليه أجليه
حينزلك من العالي
أفلام الليل مضروبة
في السوق في الوقت الحالي..!!!
* إلي اللواء صلاح الدين المعداوي محافظ الدقهلية
ع النبي صللي
شفت بعيني محدش قاللي
شفت شوارع المنصورة
عليها تجللي
شغل اداري شغل محلي
ع النبي صلي....!!! يدوم..!!
* إلي الصحفي الدبور الاستاذ عادل دربالة الأخبار
بيقولوا في كفر الأصالة
اللي يعلق صورة نبيل عصمت
في مكتبه يبقي دربالة
وشارب صحافة الخبر السريع
من بلاط صاحبة الجلالة..!!!
* إلي النائب عبدالمنعم أبو الفتوح المرشح المحتمل لرئاسة الجمهورية
بيقولوا في الاسكندرية
الضربة اللي جات لك
في دماغك
ضربة مفترية..!!
فتحت دماغ مصر كلها
ودماغ الحرية..!!!
* إلي صديقي السينارست يوسف معاطي
من جار علي شبابه
بالشغل الكتير في الأفلام
جارت عليه شيخوخته
بالبرد والزكام
واسأل مجرب
ولا تسأل عادل إمام..!!
* إلي اللواء محمد ابراهيم
الشعب المصري يناديكا
الله يخليكا
ويبارك فيكا
الشارع المصري محتاج
خطة أمنية فورية مستوردة
من أمريكا..!!!
إلي أعضاء مجلسي الشعب والشوري
بيقول عم نور
تعالوا ندخل الرئيس التوافقي
في الدستور
وكل حزب يختار رئيس جمهورية
ست شهور
ونلغي الانتخابات
ويبقي كرسي الرئاسة بالدور
وزغرطي ياخالتي أم دبور...!!!
* إلي النجم الفنان عادل امام اللي لازال زعيم
علي رأي الأستاذ فاروق
المعيد في كلية الحقوق
اللي يعمل خير علي قد
شهرته في السوق
ربنا ينجيه من الحبس
وينجي احفاده من كل
شر وسوء..!!!
* إلي المهندس خالد عبدالعزيز رئيس المجلس القومي للشباب
علي رأي خالتي بطة
بيقولوا في شارع الأونطة
شباب المحافظات في ورطة
وبيدنوا في مالطة
وخارج الخطة
والخطة امتة
بيقولوا في شهر ستة
يا إما في عصير السبانخ
وف صواني القرع والكفتة..!!!
* إلي المخرج الجميل علي رجب
فيلم ريكلام
فيلم أي كلام
أرشحه لتمثيل السينما المصرية
في مهرجان الإفلاس والحرام...!!
--------
لبخيت بن بيومي صاحب المساحة