معلومة قانونية..معلومات هامة يجب مراعاتها عند تسجيل العقود
١- العقد لن يكون باطلاً لو ما فيش شهود ماضيين عليه، المهم توقيع البائع مش الشهود.
٢- العقد لازم يتكتب فيه تاريخ، ما ينفعش يكون فاضى وحضرتك تقولى نبقى نكتب التاريخ براحتنا.
٣- مفيش حاجة اسمها خالص الثمن، إلا إذا تم دفع الثمن بالكامل، أما إذا دفع جزء من الثمن حضرتك بتكتب فى العقد أن ثمن الشىء المبيع كذا وتم سداد مبلغ كذا والباقى.
٤- يا ريت حضرتك سواء بائع أو مشترى تمضى على كل ورقة.
٥- فى فرق بين صحة التوقيع والتسجيل ومش كل العقود ينفع تتسجل فى الشهر العقارى ومش معنى أن العقد عليه ختم صحة توقيع يبقى أتسجل.
٦- مفيش حاجة اسمها تنازل على ظهر العقد ويبقى كده اشتريت.. اشتريت يعنى أعمل عقد بيع وشراء.
٧- يا ريت لما حضرتك تشترى شقة أو تأجر تأخد آخر إيصالات مياه وكهرباء وغاز علشان لو المشترى باعلك مش حتشوف وشه تانى وغصب عنك هتدفعهم.
٨- صحة التوقيع مهمة وبتثبت تاريخ البيع وتوقيع البائع والمشترى ولا تقول ملهاش لازمة علشان ما تندمش بعد كده وعلى فكرة ينفع المشترى يرفع صحة توقيع على البائع وكمان ينفع البائع يرفع صحة
٩- لو حضرتك اشتريت شقة تمليك وملكش حصة فى الأرض والبيت كده حضرتك ملكش أى حاجة، يعنى حضرتك اشتريت حيطان بس.
١٠- لو اشتريت شقة من واحد والشخص ده اتوفى بعدما باع لك من حقك ترفع صحة توقيع على ورثته.. عادى.
١١- عقد الإيجار ممكن يتعمل عليه صحة توقيع لو مدة الإيجار أكتر من ٩ سنوات ولو أقل من كده يبقى إثبات تاريخ.
١٢- يا ريت قبل ما تشترى شقة، تسأل هل صدر لها قرار تمكين ولا لأ، علشان لو زوجة البائع كانت عاملة قرار تمكين للشقة قبل ما يبعها يبقى عليه العوض ومنه العوض.
١٣- على فكرة عادى جداً أنك ترفع دعوى صحة توقيع على عقد ابتدائى أو عقد لسه عليه أقساط، مفيهاش مشكلة.