ألوان الحب..شعر
ألوان الحب
العين بتميز بين ألوان
و القلب كمان
و مراية الحب ساعات عامية
و ساعات احنا نكون العميان
أحمر دا الشوق
بمجرد ما يجيبو السيره
أصفر دا أكيد لون الغيره
أزرق و السما واسعة كبيرة
لكن متسعش غير القلبين
أخضر دا عمار ..
العشق الطارح شوق و حنين
هما القلبين
الحب أكيد معناه اتنين
واحد يعشق واحد بيصون
و لا فيهم و لا واحد بيخون
الحب بداية عهد و وعد
و حياة تبتدى عند المأذون
طب آخر لون
أسود يا فراق
و لا تارك بعده من الأشياء
غير بس حطام
ما ساعات بيكون الحب صدام
بيزيد ف آلام
الحب جنون و حياة تنتهى عند المأذون
ألوان الحب كتير ..
لكن أنت و ذوقك
اختر لك لون
شعر _ ولاء الدين فاروق