التفاصيل الكاملة للمشروع البحثى للطلاب من 3 ابتدائى حتى 3 إعدادى

المشروعات للتقييم وبدون درجات وحصول الطلاب على الدرجات النهائية

 

أعلن الدكتور طارق شوقى وزير التربية والتعليم التفاصيل الكاملة للمشروع البحثى الذى يؤديه الطلاب من الصف الثالث الابتدائى وحتى الثالث الإعدادي كبديل لامتحانات نهاية العام يحصل الطلاب على الدرجة النهائية فى المشروع وقدرها 140 درجة من 140 درجة وتضاف درجة المشروع إلى الدرجة الحاصل عليها الطالب فى امتحانات الفصل الدراسى الاول ويكون حاصل مجموع درجات الفصل الأول ودرجات المشروع هو المجموع الكلى للطالب فى الإعدادية والذى يؤهل الطالب لتنسيق القبول بالتعليم الثانوى العام أو الفنى. واكد الوزير أن المشروع ليس بدرجات وانما سيتم تقديره بكلمة مقبول أو غير مقبول وسيتم إتاحة الفرصة أمام الطلاب لاختيار الموضوع المطلوب للبحث. واكد الوزير أن المشروعات البحثية لن تخضع للتأويل أو التحريف من جانب اخرين وانما هى وسيلة لتخطى السنة الدراسية والحفاظ على أبنائنا من الإصابة بفيروس كورونا، وأضاف أن:

- الطالب سيكون مطالبا بإعداد مشروع بحثى واحد فقط (متعدد التخصصات) فى كل سنة دراسية للانتقال إلى السنة التالية وهو بحث واحد لكل المواد.

- ويستطيع الطالب أن يقوم بعمل المشروع بمفرده أو مع مجموعة من الطلبة (بحد أقصى 5 طلاب)، خلال الفترة من 9 أبريل حتى 15 مايو.. يعنى الطالب من حقه يختار 5 من أصحابه أو جيرانه يعملون البحث مع بعض، كل واحد يعمل حاجة ويجمعوا اللى عملوه ويسلموه بأسمائهم الخمسة.

- وسيتم مراعاة اختيار الموضوعات بالنسبة لأعمار الطلبة من الصف الثالث الابتدائى حتى الثالث الإعدادى بما يتناسب مع أعمارهم.. يعنى البحث المطلوب من طالب 3 ابتدائى هيكون مناسب لسنه وطريقة تفكيره، وطالب سنة رابعة كمثل.

- وتتكون عناصر المشروع البحثى من: «العنوان، المقدمة، متن الموضوع، النتائج أو الملاحظات، المراجع»، وسيكتب الطالب الكود الخاص به على المشروع الذى سيقوم بعمله.. يعنى الطالب يكتب فى العنوان اسم مشروع البحث اللى اختاره وبعدين يكتب اللى شافه وفهمه من عملية البحث وبعدين يكتب ملاحظاته سواء كانت أرقاما أو مشاهد وبعدين يكتب المراجع اللى قرأها، سواء كتاب المدرسة، أو أى كتاب اخر.

- وتم نشر فيديو توضيحى لطريقة عمل المشروع للطلبة على موقع الوزارة، وذلك كنموذج استرشادى لطريقة عمل المشروع البحثى بداية من اختيار الموضوع حتى يطمئن الطلاب.. يعنى الفيديو ده هيكون فيه شرح تفصيلى إزاى الطالب يختار اسم البحث وإزاى يبدأ يكتبه وإزاى يسلمه وتحدد يوم الخميس القادم لإعلان جدول المشروعات البحثية لكل سنة دراسية على موقع الوزارة ويتكون الجدول من 4 إلى 5 موضوعات لكل سنة دراسية يختار الطالب أحدها لتنفيذه سواء بمفرده أو مع مجموعة من الطلبة.. يعنى الطالب هيكون قدامك أربع أو خمس أبحاث، يختار منهم واحد فقط يكتب فيه، مش هيكون البحث المطلوب منه (واحد فقط إجباري) وكده قدامه فرصة يختار أى مشروع من اللى هتعرضهم الوزارة ويمكن للطالب فى حالة عدم توافر الإنترنت الاعتماد على الكتاب المدرسى أو أى كتاب متوفر لديه فى موضوع المشروع البحثي.. يعنى مشروع البحث هيكون من الحاجات اللى درسها الطالب أو ليها

علاقة بالمنهج اللى درسه فى السنة الدراسية اللى هو فيها.

- متاح للطالب أن يقوم بكتابة المشروع البحثى على ورق وتسليمه إلى المدرسة وهى ستقوم بإرساله للوزارة عبر المنصة الإلكترونية.. يعنى مش شرط الطالب يكتب البحث ويرفعه على المنصة الإلكترونية ومتاح له يكتب بالورقة والقلم ويروح يسلمه للمدرسة وملوش دعوة بالباقي.

- معلم الفصل دوره استرشادى ومساعد للطلبة فى إعداد المشروعات البحثية، والوزارة هى من ستتولى أعمال مراجعة المشروعات البحثية للطلاب عن طريق تقييمها (مقبول – غير مقبول).. يعنى المعلم بتاعك مش هو اللى هيصحح مشروع البحث علشان محدش يكون قلقان ويقول المدرس هيستقصدنى أو غيره، المعلم دوره أنه يرشد الطالب يعمل إيه فى مشروع البحث.. يكتبه ازاى يحله ازاى وهكذا.

- واحد هيقوللى إيه شكل مشروع البحث.. النهارده وزير التعليم قدم مثال سهل وبسيط لكنه مش هييجى زيه للطلبة، مجرد مثال بسيط وهو: ممكن نسأل الطالب (مثلا) عن تعامل دولة مصر مع فيروس كورونا بالمقارنة مع 4 دول أخرى فلابد هنا أن يستعين الطالب فى إجابته بإحصائيات وأرقام ونقارن بين القرارات الصادرة فى كل دولة للتعامل مع كورونا.

مثال آخر: لو قمت برحلة إلى الفضاء، إيه نسب الغازات الموجودة فى الغلاف الجوى وأثر غاز ثانى اكسيد الكربون على حياتنا.. مثال ثالث: تخيل إنك فى رحلة نيلية من أسوان لدمياط إيه الأقاليم المناخية إللى عديت عليها فى الرحلة دي.

وأكد الوزير أن مشروع البحث سهل وبسيط جدا، ياريت محدش يقلق، كفاية أن ابنك هيحل البحث مع أصحابه، أو هتشوف ابنك بيحل بطريقة جديدة وسهلة، مش هيكون قدامه ساعتين أو تلاتة يحل فيهم الامتحان، لأ ده قدامه أسابيع يحل براحته وهيجاوب بالطريقة أو بالإجابة اللى هو شايفها صح وهيقول رأيه كمان فى الإجابة كأنه بيعمل رسالة ماجستير بس على صغير وانت كأب اللى هتكون مشرف على رسالة الماجستير مش دكتور الجامعة.. سيبوا ولادكم يتعلموا بالطريقة اللى العالم كله بيتعلم بيها، صدقونى الموضوع ممتع ومفيهوش تعقيد.. استثمروا فى عقلية ولادكم.