"أمهات مصر" يشكو غياب المدرسين في عدد من المدارس

أكدت عبير أحمد، مؤسسة اتحاد أمهات مصر للنهوض بالتعليم، أن هناك عددا كبيرا من المدارس بها غياب شبه تام للإشراف علي الطلاب واليوم الدراسي. 

 

وأضافت عبير، في تصريحات صحفية، أن غياب الإشراف يتسبب في وقوع مشاجرات وإصابات وتصرفات غير لائقة بين الطلاب خاصة في "الفسحة"، مشيرا إلي وجود تدافع كبير بين الطلاب عند انتهاء اليوم الدراسي. ويتسبب في حدوث إصابات للطلاب خاصة الصغار علي سلالم المدرسة، وكذلك حدوث مشاجرات بين طلاب المراحل المختلفة وتعدي الكبار علي الصغار في بعض المدارس، مطالبة الوزارة والمديريات التعليمية بالتشديد علي المدارس في الإشراف وتواجد مشرف بكل دور بالمدرسة ومتابعة الطلاب.

 

وتفاعل أولياء الأمور علي صفحة اتحاد أمهات مصر للنهوض بالتعليم في الفيس بوك، حيث قالت ولي أمر: "ابني في مدرسة خاصة بالمنصورة، وكام مرة ييجى مضروب من أولاد أكبر منه فى السن، ووضع الاشراف سيئ والأولاد بيضربوا بعض ومحدش بيقولهم انتم فين بالرغم من إنها مدرسة خاصة، ولما نتكلم يقولوا الكثافه عاليه وطبعا الكثافه ارتفعت فى ال٣ سنوات اللى فاتت بسبب المحافظ اللى كان موجود كل ما المدير يرفض حد ولى الأمر يجيب تأشيره من المحافظ والمدير يقبله والفصول عدت ٧٠ طالبا فى الفصل وأصبحت مثل الحكومى كمستوى، وابنى كان مرة عينه هتروح لولا ستر ربنا".

 

وأضافت ولي أمر: "والله حضرتك إحنا في مدرسة حكومية، أول الترم ما ابتدي ولا فيه إشراف ولا أي حاجة، والميس كمان بتسيب العيال في الفصل لوحدهم وبتوقف عليهم عيال من ٦ ابتدائي وتنزل معرفش بتروح فين والعيال في المرواح بتبقي مدعكة واللي بيقع ويدوسوا عليه وحاجه آخر إهمال"، وتابعت ولي أمر أخري: "لا للأسف الإشراف شكليا موجود لكن فعليا لأ، الولاد الصغيرين بيتضربوا من اللي أكبر منهم ولما بيشتكوا للأخصائية أو مديرة مش بيتم التعامل مع الشكوي إلا بوجود ولي الأمر، ابني في أولي ابتدائي وجالي مسحول قبل كدا وكل يوم يحكيلي عن

أصحابه اللي بيتضربوا من ولاد أكبر منهم وطبعا في المرواح حدث ولا حرج، لولا أن بقول لابني يستني في مكان معين كان زمانه اتهرس، مفيش نظام ولا اهتمام بالأطفال الصغيرة خالص".

 

واستكملت ولي أمر أخري: يعني اسمحوا لي إني ادخل، أنا شايفة إن معظم الشكاوى إن الطلاب هما اللي بيعتدوا على بعض بالضرب، لو البيت اهتم أنه يعرف ابنه إن دي مدرسة مش ساحة فرد عضلات، المدرس هيعمل إيه ولا إيه، اصلا المدارس المفروض يكون فيها مشرفين وتبقى دي شغلتهم".

 

وقالت أخري: "إحنا فى مدرسة تابعة لإدارة عين شمس التعليمية، ماعندناش وجود أصلا لمشرفين دور والنتيجة طبعا خناقات بين طلبة الإعدادى والثانوى وآخرهم خناقة كانت كارثة بين الطلبة وكان فيها إصابات، ودى كمان مدرسة مشتركة وفيها أطفال من كى جى وابتدائى وممكن يتأذوا". وفي المقابل قالت ولي أمر أخري: "اللهم لا حسد، مدرستنا إلى حد ما الإشراف فيها علي أكمل وجه، وفى كثافة عدديه مع الطلاب وفى اهتمام فعلا من أول حصانه Kg لحد الإعدادى من أول دخول الطالب من باب المدرسة حتى وقوفه فى الطابور إلى صعوده إلى نزوله لفسحة حتى نزوله أثناء الحصص المعامل والألعاب فى الفناء حتى خروجه، بجد أجمل وأحسن حاجة فى مدرستنا النظام والإشراف أمانة".