الأقوال المستباحة في النقد والصراحة

 

* إلي الدكتور فتحي سرور اللي كان رئيس مجلس الشعب

بعد القبة.. والفيلا والسرايا

وسيد قراره والناس ماشين ورايا

أخرج من النيابة بستخبه بالملايه »دنيا«

* إلي جمال وعلاء ومبارك

يا حلوة يا بلحة يا مقمعة

نهاية الظلم والبرطعة

شرفتي سجن المزرعة »مبروك«

* إلي الصحفي والكاتب إبراهيم عيسي

كلمتك المقروءة يا عبقرية

اقوي وأصدق من كلمتك

المسموعة والمرئية »صراحة«

* إلي عبد الله المصري الغلبان مجهول العنوان

المذكور أعلاه

علي باب الله

راح يزور الحكومة في اللومان

وواخد عيش وحلاوة

ونص كيلو برتقان

اختفي ولم يعد حتي الآن.

* إلي الإعلامية نهال كمال رئيس التليفزيون

الناس اللي زي الفل..

في بلدنا ملهاش حل..

بتفرض حسنها ع الكل.. صراحة

* إلي الحاج عطا نصار عمدة العمد في القليوبية

بما أن لك شعبية

وطنية

ومحارب قديم للفساد والبلطجية

اتوكل علي الله

واترشح لرياسة الجمهورية

* إلي عبدالعظيم وزير اللي كان محافظ القاهرة

ربنا يكفيك شر البلاوي

والعواطلية اللي علي القهاوي

ودعوة غجرية

في ساعة فجرية

مسلطها جلال الشرقاوي..!!

* إلي الأستاذ اسامة هيكل رئيس التحرير

اعذرني يا خالي

الحب راسمالي

كل اللي يقرالي واللي يصححني

واللي بيكتبني ميغبش عن بالي

»اعتذار«

* إلي شعب محافظة قنا

الشرقاوية عزموا القطر

كرم.. لو تعلموا..

والصعيدي اللي يقف في سكة القطر

أخاف عليه القطر يفرموا »نصيحة«

* إلي النجم الزعيم عادل إمام

عايز اقولك

واللاّ اقولك

مش حقولك

وانت عارف قصدي ايه

من غير م أقولك »فزورة«

* إلي اللواء سمير فرج اللي كان محافظ الأقصر

بعد التاريخ والشهرة

حتة حمام سباحة

يبقي قضية كبري

يارتنا ما روحنا لقصر

وكنا فضلنا في الاوبرا »غلطة«

* إلي سامي الشريف رئيس اتحاد الاذاعة والتليفزيون

آخر كلام

عايز تظبّط ماسبيرو

ويبقي آخر تمام

شوف لك وزير اعلام

لمدة عام..!!

* إلي الطيار حسني مبارك اللي كان رئيس للجمهورية »تاني مرة«

طالبين منك قرض بسيط

كام مليار

نسد ديونا

وانت عارفنا شعب طيب

بس عبيط

حنسددهم بس يا ريس بالتقسيط »غلابة«