محمد فضل يكتب "بقيت شاطر"
بقلم _ محمد فضل
بتحكي سيرتك الفايتة
بدون تفاصيل تعرّيها
تبيّن إيه كسب قلبك
و تخفي إيه خسر فيها
و تنظر للي سامعينك
بنَظرة كُلها حِكمة
فاميلاحظوش شقوق عينك
من الخيبة و م الصدمة
بقيت شاطر
في إنك تفقد الأشياء
و تنسى الصُحبة و الأسماء
بلامبالاة
و بتسافر
إلى المجهول بدون عنوان
و تضحك ضحكة النسيان
و لا بتنسى
و كُنت إنتَ
وشَكلك.. مابقتشي معاك
و من قهر الحياة سيباك
بتتكَرمِش!
و من إمتى
فضل إنسان كما كان خام؟
تملّي تشوِّشُه الأيام
فايتنَغمِش!
ولسه وشك المتشاف
بيضحك للصحاب حواديت
و لسه وشك التاني
شريد في السكة مالهوش بيت!