ضربة البداية
بعد أن انفض مولد القمة 123 بين الأهلى والزمالك والفوز العريض الذى حققه أبناء القلعة الحمراء 5/3.. وجدت أنه من الواجب أن نصل إلى صيغة أكثر احتراما للتعليق على المباريات بعد أن أطلق الكابتن مدحت شلبى مجموعة من الافيهات (البلدى) التى حولت المباراة إلى (اسكتش) القمة.. وأثارت استفزاز جماهير الزمالك التى وجدت الأهداف تتوالى فى شباك ابوجبل فى شوط أشبه بـ(الكابوس).. وفى الوقت نفسه يطلق شلبي افيهاته المتتالية والتى عمقت من جراح مشجعى الأبيض.. ومن بين الافيهات التى أطلقها شلبي.. بعد هدف ديانج الأول (الأولانية فى العارضة.. والتانية فى ضهر الزبون.. والتالتة فى الشبكة.. اى اى اى)!!.. وواصل افيهاته مشيدا بهذا الهدف.. (ديانج حط جول لانج اللانج ).. وبعد الهدف الثانى من ضربة جزاء تهكم على ابوجبل (على معلول خلى الزبون بهلول فى اسطنبول.. يا عينى عليك يا معلول يا اللى حطيت الزغلول.. اه منك يا لول) !!.. وواصل شلبى بعد الهدف الثالث الذى سجله محمد شريف من اسيست عالمى لعمرو السولية.. (العفيف الشريف المخيف يا لطيف يا لطيف)!!.. (ايه الكعب المتحنى ده.. ده كعب متحنى قبل ما ييجى الماتش.. مشوفتوش منك قبل كده.. ايه الكعب ده.. وايه القفلة دى.. يخرب عقلكوا هاردلك يابوجبل.. هاردلك يا حبيبى.. بصراحة الكعب بتاع السولية ده فيه افترا)!!.. وواصل استفزازه لجماهير الزمالك.. (الشياطين الحمر النهارده طلعوا فى عز الليل) !!.. وبعد انتهاء الشوط الأول بثلاثية حمراء نظيفة اطلق إفيه.. (موسيمانى هايخس النص النهارده.. وده لمصلحته عشان بطنه العالية دي) !!.. وامام تألق أكرم توفيق وتفوقه على أشرف بن شرقي..
(والله وبقيت تلعب بالكعب يا أكرم ).. وكذلك (هههههه يا ساتر يا قفشة يا ساتر عليك يا اخى).. وتنوعت الافيهات.. (موسيمانى عامل متاريس وفى مقدمتهم الترباس الأكبر اكرم توفيق).. (لا ده انت مفترى، روح بلدك احسن.. الافترا مش هيمشى عندنا ابدا.. ايه الافترا ده يا ديانج .. واحدة بالشمال والتانية باليمين والتالته ع الجبين.. يا عيون ماما انت قولى طالع لمين جميل بالشكل ده يا ديانج)!!.. و(المثلوثى بدل ما يشوط الكورة شاط الزبون).. و(مكسمونى ولا مكسمانى ولا اه يانى).. و(كل الطرق تؤدى إلى ابوجبل.. معقول الكلام ده يا جماعة) ؟!.. إذا كانت هذه الافيهات قد أسعدت عشاق الفانلة الحمراء.. إلا أنها وبمنتهى الموضوعية (أوفر).. ومستفزة جدا وأقرب إلى الاستهانة والسخرية وهو أمر بعيد تماما عن الروح الرياضية التى ننادى بها جميعا لنقضى على التعصب الذى يمكن ان يتسبب فى ضياع أرواح بريئة !