تقريبًا كده إعلانات رمضان السنة دى هى الأغلى والأحلى ويمكن الناس وتحديدًا الأطفال بتستنى إعلانات معينة فى فواصل المسلسلات والبرامج عشان الإبهار والجمال والمناظر الطبيعية والبحر والملابس والديكورات والأغانى والألحان والإخراج، وتقريبًا كدة مفيش ممثل ولا مغنى معملش إعلانات السنة دى، وطبعًا الميزانيات مفتوحة والصرف باين الصراحة خصوصًا فى إعلانات شركات المحمول الأربع وكمان إعلانات الكومباوندات والعقارات والأجهزة الكهربائية والسلع المعمرة، يعنى وبقينا نشوف نجوم الفن متجمعين فى إعلان واحد وكل الممثلين اللى فى المسلسلات موجودين فى الإعلانات واللى مش موجود فى مسلسل موجود فى إعلان.. والحقيقة بقى أن هذا الكم الهائل من الإعلانات الذى يزيد على زمن عرض المسلسل أو البرنامج ظاهرة صحية وحتى لو كان الإعلان لا يحمل رسالة محددة أو واضحة للناس فهو فى النهاية تواجد ومشاركة من الشركة لعملائها بمناسبة شهر رمضان اللى أصبح كده من غير مناسبة موسما للإعلانات والاستعراض والمقالب السادية العنيفة والهزار وخفة الدم حتى لو كانت مجرد عادة وأكيد حضرتك كل يوم بتلوم نفسك إنك بتتفرج على الحاجات دى ولكن بترجع تانى يوم تتفرج على نفس البرامج والمسلسلات والإعلانات وتلوم نفسك تانى عادى بقى ما تزعلش كلنا بنعمل كدة.
ولكن اللافت للنظر وجود نجوم كبيرة جدا وكأنها تعلن عن نفسها وتقول لجمهورها ولكل الدنيا نحن هنا ورغم السن الذى تعدى الخمسين إنما إحنا شباب والشقاوة فينا وده واضح جدًا فى أكتر من إعلان ونجوم ونجمات مطربين وممثلات راغب علامة وشريهان وليلى علوى ونانسى عجرم وحماقى وتامر حسنى ومنى زكى ويسرا ودينا الشربينى وشيرين رضا ونيللى كريم ومدحت شلبى ونجوم المهرجانات وكريم عبدالعزيز وأمير كرارة وسمير غانم وإيمى ودلال وطبعًا مو صلاح وكتير غيرهم عشان بس ما ننساش حد.. كل التقدير والاحترام لنجوم الغناء والكرة والتمثيل وكل التقدير والاحترام للشركات المعلنة ولكن يبقى ملاحظات مهمة وهى أنه لازم فى إعلانات منتجات معينة وشركات المحمول بالذات يرتبط النجم بالشركة بمعنى أنه مينفعش خالص يبقى السنة دى بيعلن لشركة معينة والسنة اللى فاتت كان مع شركة تانية واللى بعدها مع شركة تالتة كدة يعنى مفيش كلام عك إنما طالما أن الحكاية استعراض عضلات وخلاص مفيش مانع المهم أن الناس تتفرج وتعود تتفرج وتنتقد وكله تواجد ومشاركة وخلاص وكل سنة وأنتم طيبين.