ع الطاير
فى بيت شعر عبقرى للمتنبى بيقول فيه: «أغاية الدين أن تحفوا شواربكم؟ يا أمة ضحكت من جهلها الأمم»، وطبعاً المعنى واضح جداً ومش محتاج شرح وتوضيح وهو باختصار كده يسخر من المظهرية.. والحقيقة أن هذا ينطبق على سلوك شركات المحمول الأربع اللى بتتسابق دلوقتى على استئجار أغلى وألمع نجوم الفن والكرة للإعلان ومحاولة إقناع العملاء بأن الشركة هى الأقوى والأهم والأعظم والأسرع والأوفر وكل حاجة حلوة.. وفى انتظار هلال رمضان حتى يهل هلال إعلانات شركات المحمول والبحث عن الإبهار والمنظرة يعنى ومش مهم بقى مستوى الخدمة المقدمة للمواطنين، خصوصًا أن هناك تقاربًا فى المستوى، الصراحة يعنى مفيش غير المنظرة بقى.. إنما كما يقول بيت شعر عبقرى أيضاً: السيف أصدق أنباء من الكتب، يعنى الأفعال وليس الأقوال، يعنى مهما كانت الأغنية حلوة والنجوم بملايين والإبهار جامد يبقى إحساس الناس بمستوى الخدمة وكفاءة الشبكة.
ومنذ أيام أصدر الجهاز القومى لتنظيم الاتصالات قائمة بأهم حقوق المستخدمين التى ألزم بها الشركات منذ التعاقد والاستخدام والمحاسبة أيضًا حتى يعرف الناس حقوقهم وطبعًا دى خدمة جديدة من الجهاز عشان خاطر الناس تعرف إيه اللى بيحصل وإزاى يحصلوا على حقوقهم بضمان الجهاز وهنا فى التزامات مهمة على الشركات تتعلق بالأمور المالية كالشحن والفواتير ومتابعة الاستهلاك.
ومن الآخر مش ممكن إشراكك فى أى خدمة من دون الحصول على موافقتك المسبقة وحماية بياناتك الشخصية والحفاظ على خصوصيتك.
طيب فى حالة الشكاوى طبعاً فى حماية من الجهاز يعنى الأول يضمن لك التواصل مع خدمة عملاء الشركة على مدار 24 ساعة للاستفسار أو الشكوى وتصعيد الشكوى إلى مركز اتصال الجهاز على مدار 24 ساعة فى حالة عدم الوصول لحل يرضيك مع الشركة كمان من حقك الحصول على رسائل مجانية دورية باستهلاك الباقات المتعاقد عليها وإخطارك من خلال رسالة مجانية بالمبلغ الذى قمت بشحنه وأية مديونيات تم خصمها من رصيدك فور الشحن وضرورة إخطارك قبل إيقاف الخدمة بأسبوع على الأقل فى حالة عدم دفع مستحقات الشركة.
والحقيقة بقى أن شركات المحمول رغم كل العقبات والصعاب وظروف كورونا وموجاتها تعتبر أن إعلان رمضان طقس جميل من طقوس احتفالات الناس برمضان وتبالغ فى المنظرة والمظهرية وكمان إيه بقى الحفاظ على أقصى درجات السرية فى موضوع الإعلان والنجوم اللى ح يبهرونا.. مش فاهم يعنى إيه الكلام ده وليه حكاية السرية دى إنما على الأقل نوع من الغموض والترقب ساسبينس يعنى ماشى الحال.. كل سنة وأنتم طيبين.