رئيس حزب الوفد

بهاء الدين أبو شقة

رئيس مجلس الإدارة

د.هانى سري الدين

رئيس التحرير

وجدي زين الدين

ع الطاير

فودافون.. وياسمين صبرى واللامعقول

 

 

يمكن أول حاجة جات على بالك لما قرأت العنوان إن الاثنين حلوين الاثنين جامدين محتار أشيل مين ولا أشيل مين جوا عيونى على رأى الشحرورة صباح لما غنت للأهلى والزمالك.

بس أكيد طبعا مش ده قصدى ولا أقصد أيضا أن الاثنين بيفضلوا اللون الأحمر على أساس إنه علامة أو لوجو فودافون باللون الأحمر  وإن معظم فساتين وملابس ياسمين صبرى فى المسلسل الرمضانى فرصة ثانية باللون الأحمر وأن الميك أب عندها يغلب عليه اللون الأحمر. 

وطبعا لا أقصد أن إعلان فودافون الرمضانى مع النجم محمد صلاح ونجوم الفن العشرة ومعاهم صوت شيرين آه ياليل ربما يتخلل أو لا يتخلل مسلسل ياسمين صبرى فرصة ثانية على جميع المحطات التليفزيونية التى تعرضه وتعيد عرضه فى أوقات مختلفة رغم كل التحفظات والتعليقات على المسلسل وأحداثه المفبركة بطريقة غريبة تثير دهشة وسخرية المتابعين خاصة حكاية فقدان الذاكرة اللى هو محصلش أساسا بس ياسمين قال عملت كده حركة يعنى عشان تنتقم ثم جاء الانتقام أكثر سذاجة عندما اتفقت قال مع زميل آخر يمثل إنه بيخطبها  ويعملوا حفلة كبيرة عشان تقول لزياد كلمتين.

وبصرف النظر كمان عن غياب المنطق واللا معقول فى الحبكة الدرامية للمسلسل وبصرف النظر عن التعليقات الكثيرة على أداء ياسمين صبرى التمثيلى وانتقادها بأنها مبتعرفش تمثل وإن جمالها فقط هو جواز مرورها إلى عالم الفن والسينما والتليفزيون وإنها محتاجة فرصة تانية رغم إن رأيى الشخصى كما قلت من قبل وسأظل أكرر إن حكاية بتعرف تمثل أو ما بتعرفشى دى مسألة نسبية  يعنى ممكن حضرتك تشوف كده وحد تانى يشوف العكس وقلنا إن التمثيل أساسا ليس فنا ولكنه همبكة طبقا لرأى رشدى أباظة الذى قال إنه لا يشعر أن التمثيل فن وإنما همبكة. 

وقلنا إن ضبط عملية التمثيل وأداء المشهد ده شغل المخرج وإن مهمته بالإضافة إلى كل شيء أن يوجه الممثل أو الممثلة للأداء بالطريقة التى تناسب الدور والموقف ومهما كانت الخلافات بين المشاهدين حول أداء وتمثيل ياسمين صبرى فإنه لاخلاف على أناقتها وجمالها ورشاقتها ماشى على أية حال ده مش موضوعنا.

بقى أن تعرف إيه حكاية ياسمين صبرى وفودافون وإيه العلاقة بينهما 

أقول لك ياسيدى تصدق إن ياسمين صبرى فى بداية حياتها العملية فى الإسكندرية كانت تعمل موظفة فى فودافون فى قسم المبيعات الـ Sales وكانت بداية الانطلاق من فودافون يمكن تقول مش معقول إنما هو ده اللى حصل يعنى لازم تعرف إن الدنيا حظوظ  وأنه ليس  بالجمال وحده تصل إلى المجد والنجومية وأن هناك جميلات أخريات فى مصر وفى العالم لا يصلن إلى فرصة أولى ولا فرصة تانية وأنه الحظ  والبخت والنصيب أشياء مهمة فى الحياة وكل عام وأنتم بخير.