أوشك شهر رمضان على النهاية بسرعة، يا رب تقبل منا صومنا وقيامنا وصالح أعمالنا، وبمناسبة الأعمال رغم الفارق الكبير فى مفهوم الكلمة وثوابها فإن ما نشاهده على شاشات التليفزيون لا يسر عدوا ولا حبيبا، فالأعمال المقدمة منزوعة الدسم الدرامى والإنتاجى وبعض الألفاظ الخارجة عن قيم مجتمع وتقاليد تربينا عليها، من ساعة رمضان ما كان رمضان بجد لما كنا بنجرى ونلعب بالفانوس أبوشمعة اللى كنا بنعمله عند السمكرى ونجرى نلعب بيه، أيام ما كان رمضان شهر عبادة بجد شهر تراحم ومودة وصلات رحم، شهر كانت الناس تتابع مولانا الشيخ الشعراوى فى التليفزيون وبتفطر على صوت مدفع الإذاعة وأذان الشيخ رفعت وتواشيح النقشبندى ويسحرهم بدرى عمنا سيد مكاوى، وما بين الإفطار والسحور كانت الأسرة كلها بتسمع فوازير البرنامج العام للمرحومة آمال فهمى وفوازير نيللى وشريهان والفخرانى وفطوطة للمبدع والفنان سابق عصره المرحوم فهمى عبدالحميد، وبعدين مسلسل دينى يحمل قيما إسلامية كبيرة سواء للمرحوم أحمد طنطاوى أو المرحوم أحمد توفيق يتبارى فيه نجوم وأساطين الفن من عظماء هذا التاريخ ونسمع المسحراتى وننام وبعدين نقوم نصلى الفجر وننام تانى، والصبح من بدرى على أشغالنا الفلاح فى غيطه والعامل فى مصنعه أو حرفته والموظف فى عمله، شغل بجد قبل ما رمضان يبقى سبب الكسل وتأجيل الأعمال مع تعطيل لمصالح العمل والناس بحجة الصوم، رمضان زمان كانت عاداته وتقاليده صورة لعادات وتقاليد مجتمع مسلم صوت وصورة مش زى رمضان دلوقتى، رمضان كانت مسلسلاته الدينية والاجتماعية زى (محمد رسول الله، وليالى الحلمية، والشهد والدموع، وبوابة الحلوانى، وهوانم جاردن سيتى) مسلسلات تلتف حولها الأسرة لنشاهد قيم وتقاليد مجتمع مصرى يحترم عقول مشاهديه، أما رمضان الحديث دا رمضان غريب علينا جدا رمضان بقى عند الكثير من الناس حشد الفلوس لبناء كرش كبير وكأننا ماكناش بناكل قبل رمضان ونفطر ونتخدر عشان عقلنا يستقبل هيافات وتفاهات ومرمطة رامز أبوشلال لرموز المجتمع فى الفن والرياضة والغناء وبجبروته عايزنا نصدق أن كل دا بيتم فجأة مش فبركة وتمثيل مدفوع الأجر مع شوية تريقة وتهزيق لهذه الرموز وفى الآخر يضحكوا ويتصالحوا!! طبعا ما إحنا مغيبين ومخدرين من كتر الأكل بعد الفطار وتوابعه وبنصدق هذه التمثيلية الهزلية المتكررة وخد عندك بقى مع شيخ الحارة ومع عايشة.. ومع السلامة ونكمل فى المقال المقبل لنستعرض معاً ملاحظات البرامج والدراما، والله المستعان.
الإعلامى سعد عباس
رئيس مجلس إدارة شركة صوت القاهرة للصوتيات والمرئيات السابق