ع الطاير
بصراحة كده تقدر تستغنى عن موبايلك كم ساعة في اليوم؟ طيب تقدر تتخلص خالص منه لمدة عام كامل؟.
أعتقد صعب جدا.. عشان كده في شركة أمريكية عملت جايزة قدرها 100 ألف دولار للي يقدر يستغنى عن الموبايل وطبعا التابلت أو الاي باد لمدة عام كامل وبالتأكيد لازم يكون المشترك في المسابقة أمريكيًا مش مصري لأنه لو سمح للمصريين دخول المسابقة أعتقد كلنا حنرمي الموبايل، دي جايزة ضخمة يا عم مليون و800 ألف جنيه مصرى فليذهب الموبايل إلى الجحيم افرمه كده.
وطبعا لأننا نستخدم الموبايل في كلام فاضي وفرجة وهرتلة وهري وهبد يبقى أي مبلغ مالي أحسن منه إنما لو كانت للموبايل قيمة ما في الاقتصاد يعني ممكن أشتغل من خلال الموبايل وأنتج أي حاجة او أضيف اي حاجة أو أبيع أو أشتري أي حاجة أو أي خدمات ممكن وقتها أحسبها أنا بكسب كم من عملي على الموبايل وطبعا التابلت.
وهنا يجب الاشارة إلى أن عددًا كبيرًا جدا من مستخدمي الموبايل والانترنت في مصر شغلتهم على الموبايل برورم يعني ولا حاجة الا قتل الوقت والتريقة على كل شيء والفتي في كل مكان وكل حاجة ويمكن مشاهدة فيديو كليب أو أفلام اللي بالي بالك وحاجات من هذا القبيل وبعدين نرجع نقول النت زفت الباقة بتخلص والنت بطئ ونهدر ثروات البلاد من الانترنت وتضيع طاقات الشباب في كلام فاضي.
إذن لابد من وجود توجه جاد من وزارة الاتصالات وتكنولوجيا المعلومات تحديدا لتدريب وتأهيل وتشغيل الشباب واستغلال مهارات بعضهم في ابتكار أو إنتاج أي شيء في الحياة تسهم في اقتصاد المعرفة الذي أصبح أهم اقتصاد في العالم ويحقق أعلى مستوى من القيمة المضافة ونفتح المجال أمام العباقرة من شباب مصر للابتكار والإنتاج والإسهام في إنتاج التكنولوجيا التطبيقية وليس فقط استهلاكها أيضا يجب إسراع الخطى على طريق الحكومة الذكية الاسمارت نحو عالم رقمي حقيقي.