حاجات.. تضحك!!

حاجات كتيرة بنعملها كلنا.. وإحنا مش واخدين بالنا.. ولما حد يذكرنا بيها.. بنموت من الضحك على نفسنا!!

وهى فى الغالب تصرفات وأشياء حصرية.. لا يقوم بها إلا المصريون فقط.. دون شعوب الأرض كلها..

تعالوا نقرأها معاً.. ونستمتع ونضحك على نفسنا.. زى ما حدث معى عندما طالعتها على صفحة أحد الأصدقاء.

فمثلاً لما حجارة الريموت تخلص بيعضها بأسنانه، آل الحجارة كده هتتشحن والغريبة فعلاً بتتشحن..

لما يشرب من الكوبايه يشرب من الناحية اللى فيها الإيد علشان محدش شرب منها..

مستحيل يسيب الشبشب مقلوب..

لو إيده مبلولة ميه بيشد الفيشة بسرعة آل يعنى مش هتاخد بالها..

لما يروح درس يعد العيال علشان يشوف المدرس بياخد كام..

لما يبقى حران بيقلب المخدة الناحية التانية..

لااازم يخبط خبطتين بالمعلقة على الكوباية بعد ميخلص تقليب تقولش بنستأذن منها قبل ما نشرب

يشتم وبعدين يقولك اللهم انى صائم..

ولازم تلاقى نص ليمونة فى باب التلاجة..

ممكن يعمل أى حاجة غلط إلا إنه يشغل أغانى ساعة الأذان لأنه شعب متدين بطبعه..

بيدخل المطبخ يبص فى المواعين ويكشف الحلل ويفتح الفرن ويبص فى التلاجة وفى الآخر يشرب ميه ويطلع..

5 دقايق ويكون عندك ويجى بعد 5 ساعات..

يتخانق هو واخوه ع ريموت التليفزيون، يقوم هو واخده، واخوه يحط إيده قدام الريسيفر..

لما يخلص علبة البيبسى لازم يرجها الأول قبل ما يرميها..

وأى حاجة تهنج أو تبوظ يقفلها ويفتحها تانى والمشكلة إنها بتشتغل..

لما بيكون بيسمع لنفسه حاجة وينسى بيبص بطرف عينه على الكتاب بسرعة ويعمل إنه افتكر..

لما الشامبو بيخلص بيحط شوية مايه فى العلبة علشان شوية الشامبو اللى فى الآخر..

لما يخبط على الباب تقولوا مين يقولك أنا..

يضحك فى العزا ويعيط فى الفرح..

قبل ما يعدى أى طريق يبص يمين وبردو شمال.. يمكن حد جاى مخالف..

يدخل السوبر ماركت يقولو هاتلى بـ2 جنيه طورشى وهو خارج يسأله الحساب كام!

لما حد يوريه صورة على الموبايل لازم يقلب يمين وشمال..

يفضل يدور ف الفوطة ع الحتة اللى محدش نشف فيها..

اه والله ده بيحصل فعلاً ابتسم أنت فى مصر..

لما ييجى ينام يفتح النور يحفظ الطريق للسرير وبعدين يقفل النور ويطلع يجرى على السرير..

لما حد يكلمه فى التليفون ويقولوا مش سامع صوتك الشبكة وحشه ميتحركش من مكانه ويقوله هااااا الصوت واضح.. الغريبة التانى يقولوا أيوه كده واضح..

 أول ما يكون فى خناقة فى الشارع يجرى على البلكونة وهو فرحان..

 يحط قنوات القرآن أول عشر قنوات ويقلب بعد القناة الــ11.