رئيس الحزب

ورئيس مجلس الإدارة

بهاء الدين أبو شقة

رئيس التحرير

وجدي زين الدين

شواكيش

دى اللحمة بحاجة وتمنين!

< رئيس حكومتنا إبراهيم محلب استخدم «تاكسى» فى جولة مفاجئة على طريقة «سوق على مهلك سوق .. بكرة الدنيا تروق».. اللهم يجعل كل جولاته خضرااااا!!

< على فكرة.. حسب تصريحات رئيس الحكومة: «راتب الوزير 32 ألف جنيه فقط».. واللى غيظنى.. ده بيكفيه فى الشهر ولا بيعمل سلفة بضمان وظيفته؟!

< بعد كروت الخبزمحدش بقى يلاقى «مسامير» فى رغيف العيش.. تفتكروا ليه؟! أجاوبكم: علشان الحكومة شغالة ع الغلابة «لت وعجن»!

< جابر بن القرموطى تناول حبوب الشجاعة الإعلامية وقالها «وش خشب» لوزير التربنة والتعليل محب الرافعى: «لو مش قد المسئولية.. سيبوها وامشوا»!!

< بالمناسبة.. أبلة «فاهيتا» سخرت من «مانشيت بن القرموطى» على طريقة حمام الشاور: «لو مفيش محتوى إتشقلب ع الهوواااا» هااا هااا !!

< أزمة المحامين والداخلية وصلت إلى خط المواجهة «لا تراجع ولا استسلام»!!

< شهرمكأفاة لكل مراقب يمنع الغش بـ«الموبايل « فى الثانوية العامة .. وطبعاً الدفع بـ«إدينى رنة»!!

< بعد فتوى الدكتور أحمد عمر هاشم بأن الجلوس على «الكوفى شوب» حرام.. قررنا منع أغنية  «شربت حجرين ع الشيشة»!!

< وزير الداخلية مجدى عبد الغفار افتتح سجن «15 مايو» رافعاً شـــعار « السجن تأنيب وإستجواب واعتراف»!!

< الهضبة عمرو دياب وصفوه بـ«هرم مصر الرابع».. وطبعاً أبو الهول هيغنى فى ودنه  «تملى معاك»!!

< «مينفعش معاه غير الشبشب» دى أول القصيدة كُفر فى مسلسل «يوميات زوجة مفروسة « فى رمضان .. والبقية تأتى فى الشهر الكريم!!

< وزير «القهربا» محمد شاكر قالها بنأورة: «الصيف السنادى من غير ضلمة».. وربنا يجعل وزارته  منورة بالشموع!!

< اللى يتنازل عن جنسيته يبقى إيه يا إخوانا  ؟! أكيد «عيّل ابن تيت!!

<الإعلامى توفيق بن عكاشة شاهدناه حالق «زلبطة» وعايز يهاجر ويفتح صالون حلاقة.. وده آخر مقص فى «إعلام المصاطب»!!

< ما بين كومباوندات «الناس الهاى كلاس « وعشوائيات «الناس البيئة» «جبل الحلال»!!

< وزارة الجوع (التموين سابقاً) بتقولكم يا شعب مش لازم تاكلوا «لحمة».. بس ممكن تاكلوا جاتوة .. تاكلوا كل اللى تحبووووه!!

< من لغة فساد هذا الزمان: «ظرفنى تعرفنى» و«أبجنى تجدنى».. ومن لغة الفهلوية: «بكش تعيش تاكل قراقيش»!!

< الحكومة ودن من طين وودن من عجين .. والغلابة  «بُق» مفتوح.. وسنان تقرقش الجوع!!

< الباعة «الجائعون» على أرصفة الشوارع يستصرخون: «الحكومة بتحاربنا فى أكل عيشنا.. والمارة يستغيثون: «فينك يا حكومة.. وإيه النظام؟!!

< هذا الأسبوع «الفحلقى» تذكرت الحكمة الصينية: «إذا كنت تخطط لكى تعيش أسبوعا فأزرع فاكهة.. وإذا كنت تخطط لكى تعيش شهراً فأزرع خضراً.. وإذا كنت تخطط لكى تعيش سنة فأزرع شجرة .. وإذا كنت تخطط لكى تعيش إلى الأبد فأزرع عقولاً».. وطبعا فى مصر تزرعها «عقول» تطرحلك «طبق فول» بالزيت الحار!!

آخر شوكشة

<< يا حكومة قلبك فين؟! دوستى عالفقير والمسكين.. دى اللحمة بحاجة وتمنين.. والفرخة البياضى بأربع رجلين.. لا فقير ولا مسكين عايشيين.. الكل عند الحكومة منسيين .. وعجبى ع الزمن العجبى!!

 

‏Elzaky2020 @ gmail. Com